Covid-19 vei hmuh thar 80 zingah Mizorama kái chhâwng 67 an awm

October 27, Thawhlehnia Mizorama Covid-19 vei hmuh chhuah mi 80 zingah Mizoram chhunga kái chhâwng mi 67 an awm a, taksaa harsatna nei (Covid-19 symptom lang) mi 19 an awm tel.

Sorkar thuchhuah leh Covid-19 positive-te awmna task force hruaitute sawi aṭanga a lan danin, hripui vei hmuh thar Mizoram chhunga kái mi 67-te chu Aizawl khawpui chhunga veng 25 leh khaw dang pathuma mite an ni.

Mizoram chhunga kai mi 67 zinga a tam zawk chu an kâi ṭanna awm hriat theih a ni a, mi 15-te erawh chu an kài ṭanna hriat theih a ni lo a, mi 15 zinga chhiar tel loh Neuhoff School, Chanmari-a zirlai 18-te chu an sikul hostel-a inkài chhâwng an nia hriat niin, an kài ṭanna tak erawh tarlan a ni lo. Ebenezer Boarding School, Zemabawka zirlai parukte pawh sikula inkài chhâwng an nih rualin, an kài ṭanna tarlan tel a ni lo bawk. 

Vanglaini palai zawhna chhangin Dr HC Laldina chuan, Covid-19 vei thite sâwngbàwl dan turah sorkarin kaihhruaina a neih sa thu a sawi a, "Mitthi tuam dan tur te, kuanga dah dan turte ruahmanna kan siam sa vek a, chumi zûlzui chuan uluk taka tuam a ni. Kuanga pawh Covid atan bik hian a hranpain kan siam a ni," a ti a; kuang chu hawn mai mai theih loh tura kilh vek a nih rualin, hmai zâwnah erawh chuan darthlalang dah a nih thu a sawi.

SRH Medical Superintendent chuan, kuanga chu damdawi hmanga phuh thianghlim a nih thu sawiin, "Mi dangin an la khawih leh tur a nih avangin a him thei ang ber turin damdawiin kan sâwngbâwl vek a ni," a ti. Zawhna chhángin, "Kut lâwnga khawihin a him tura ngaih a ni a, mahse, fimkhur thuah kut lâwnga khawih loin, kutkawr bun a ṭha a, khawih hnuah pawh kut silfai a ṭha. Tunlaiah palh awm thei a ni a, fimkhur tluk a awm lo," a ti bawk.

Dawrpui LTF Secretary chuan Sangkhuma hi Covid-19 positive a nih bakah lung lam natna a neih thu Vanglaini palai a hrilh.

Sangkhuma vui dan tur chungchangah hian Dawrpui Branch YMA chuan, mawi leh zahawm taka vuiliam ṭha an tih thu tarlangin, "Hall-ah pangngai taka vui hnua thlànmual lama vuiliam pawh kan inhuam a ni," an ti a; chutih rualin, an chhungkuaah mi zinga awm thei an awm rih loh avangin remchan zâwkna avangin SRH-ZMC aṭangin a ruang chu thlanmual pan tlangpuia vui mai an rêl tih an tarlang.

Dawrpui YMA tarlan danin, Sangkhuma nupui Lalthlamuani chu Covid-19 positive a nih avangin Bawngkawn CCC-ah enkawl mek a ni a, an fapa pawh swab sample test hmabak a nih avangin khung hran mek a ni. An chhung hnai leh an bul hnaia cheng Lalhmingliana (a unaupa)-te chhungkua pawh khung hran lai an ni bawk.