Covid-19 vei Sangkhuma a thi Mizorama hripui vei thi hmasa ber

Covid-19 vei Sang­khuma (66) h/o Lalthla­muani (c/o Thanzauva & Sons), Dawrpui chu nimin chhun dar 12 khan State Referral Hospital (ZMC)-ah a thi. Amah hi October 17-ah hripui vei a ni tih hmuh chhuah a ni a, Mizorama Covid-19 vei thi hmasa ber a ni.

Sangkhuma ruang hi nimin chawhnu khan Dawrpui Branch YMA hruaitute'n SRH-ZMC aṭangin an la a, an inah luhpui loin, thlànmualah kaltlangpui a ni a; thlàn-mualah vuina hun hman a nih hnuah phùm a ni.

State Referral Hos­pital (SRH) medical superintendent Dr HC Laldina'n Vanglaini palai zawhna chhánga a sawi danin, Sangkhuma hi October 18 zing dar 3 velah SRH-ah admit a ni a, Thawhah a neih nasat avangin ICU-ah dah luh nghal a ni.

Dr HC Laldina chuan, "Kan theih ang tâwkin kan enkawl a, a ziaawm deuh dawn emaw tih laite pawh kan nei. Ama'rawhchu, vanduaithlak takin chhun dar 12 khan a thi ta a ni. Ani hi Covid-19 a nih hi a chiang a, a kum a tam deuh tawh a, thisen sang, zunthlumte a lo nei tel bawk," a ti a; chu'ngte avang chuan a taksaah hmasawnna duh angin a chak thei lo tih a sawi.

Sangkhuma chu thisen sang leh zunthlum nei tel a nih thu a sawi rualin Dr HC Laldina chuan, "Covid-19 kái chiang a ni a, chuvangin, a thihpui ber nia kan hriata pawh hi Covid-19 natna hri vang a ni," a ti.

Dr Lalramenga, medicine specialist chuan, Sangkhuma chu upa lam a nih avangin a tuar na hma tih sawiin, "Covid-in a khawih aṭangin a ná a, a serious em em a ni," a ti a; chutih rualin, tun hnaiah an lâwm chho viau a, ventilator-te pawh hmang loa enkawl theih mai an beisei hman tih a sawi.

Sangkhuma chu nimin chawhma dar 10:30 vel aṭangin a buai zual tih sawiin Dr Lalramenga chuan, "Theihtawpin kan han bei a... ICU-a awmte'n theihtawp an chhuah hnuah an beidawn thute kan dawng a, chhun dar 12 khan kan inthlah ta a ni," a ti. Covid-19 vanga an inchán chu pawi an tih tak zet thu sawiin, "Kan rilru a ná a, thawktute pawh kan inhnêm mawlh mawlh a ni," a ti.

Zawhna chhangin Dr Lalramenga chuan, ICU-ah Covid-19 vei mi pathum/pali vel an awm tâk deuh reng thu a sawi a, "Serious tak takte kan nei ṭhin. Tunah pawh hian tlangval fel tak serious deuh hlek kan nei a; tun lawk (nimin chhun)-ah erawh kha chuan kan lawm hret e, an rawn ti," a ti a, damlo enkawltute'n 'Kan lawm' an tih rualin, Pathianin remruat dan a nei a, Pathian thu thu a nih thu a sawi. 

Vanglaini palai zawhna chhangin Dr HC Laldina chuan, Covid-19 vei thite sâwngbàwl dan turah sorkarin kaihhruaina a neih sa thu a sawi a, "Mitthi tuam dan tur te, kuanga dah dan turte ruahmanna kan siam sa vek a, chumi zûlzui chuan uluk taka tuam a ni. Kuanga pawh Covid atan bik hian a hranpain kan siam a ni," a ti a; kuang chu hawn mai mai theih loh tura kilh vek a nih rualin, hmai zâwnah erawh chuan darthlalang dah a nih thu a sawi.

SRH Medical Superintendent chuan, kuanga chu damdawi hmanga phuh thianghlim a nih thu sawiin, "Mi dangin an la khawih leh tur a nih avangin a him thei ang ber turin damdawiin kan sâwngbâwl vek a ni," a ti. Zawhna chhángin, "Kut lâwnga khawihin a him tura ngaih a ni a, mahse, fimkhur thuah kut lâwnga khawih loin, kutkawr bun a ṭha a, khawih hnuah pawh kut silfai a ṭha. Tunlaiah palh awm thei a ni a, fimkhur tluk a awm lo," a ti bawk.

Dawrpui LTF Secretary chuan Sangkhuma hi Covid-19 positive a nih bakah lung lam natna a neih thu Vanglaini palai a hrilh.

Sangkhuma vui dan tur chungchangah hian Dawrpui Branch YMA chuan, mawi leh zahawm taka vuiliam ṭha an tih thu tarlangin, "Hall-ah pangngai taka vui hnua thlànmual lama vuiliam pawh kan inhuam a ni," an ti a; chutih rualin, an chhungkuaah mi zinga awm thei an awm rih loh avangin remchan zâwkna avangin SRH-ZMC aṭangin a ruang chu thlanmual pan tlangpuia vui mai an rêl tih an tarlang.

Dawrpui YMA tarlan danin, Sangkhuma nupui Lalthlamuani chu Covid-19 positive a nih avangin Bawngkawn CCC-ah enkawl mek a ni a, an fapa pawh swab sample test hmabak a nih avangin khung hran mek a ni. An chhung hnai leh an bul hnaia cheng Lalhmingliana (a unaupa)-te chhungkua pawh khung hran lai an ni bawk.