KHAWTHLIR
Chapchàr Kût
Vawiin hian chhun dar 12 aṭangin Lammualah Chapchàr Kût hman ṭan a ni dawn a, naktukah Lammualah leh Mizorama khaw hrang hrangah hman zui a ni ang. Vawiina Lammuala Chapchar Kût hmannaah hian minister Lalthansanga khuallian a ni dawn a, Mizo hnam làm leh zai ṭhenkhat entir a nih dawn bakah, Zo hnam péng hrang hrangte'n an hnam lâmte an entir dawn a, zaithiam eng emaw zat an zai bawk ang. Kumina Chapchar Kut thupui chu 'Zo nun ze mawi - Hawihhâwmna' tih a ni.
PYD-in thisen pe
PYD (Mizoram UPC), Serchhip Bial chuan PYD din champha pualin March 4, Thawhlehni khan Serchhip District Hospital tan thisen unit 17 an pe a, petute mipa 14 leh hmeichhia pathum an ni.
Ruang phurhna
Social Welfare minister Lalrinpuii chuan nimin khan MNF member Lalchhandama Ralte zawhna chhangin, September 1, 2024 aṭanga sorkarin mitthi ruang phurh man a tumsak aṭangin February 17, 2025 thlengin ruang 369 phurh a nih tawh thu House a hrilh. Minister chuan, "Mitthi ruang 369 phurh man cheng nuai 36.67 dawn tawh a ni a, mitthi ruang 320 phurh man cheng nuai 31.48 pek chhuah tawh niin, mitthi 49 phurh man cheng nuai 5.18 pek tura ruahman mek a ni," a ti.
Film chhuah dawn
Information & Public Relations department chuan vawiin leh naktuk hian IPR Lianchhiari Rûna mini theatre-ah Chapchar Kût pualin Mizo lemchan (film) pali a thlawnin an chhuah dawn. Film chhuah hi chawhma dar 11 aṭanga chawhnu dar 2 thleng neih tur a ni a, a duh apiang tan en theih a ni ang.
Kawng enfiah
Kolasib DC Robert C Lalhmangaiha chuan March 4, Thawhlehni khan NH no. 306 leh 06 (Vairengte - Bilkhawthlir leh Kolasib-Kawnpui inkar) kawngpui blacktop hna thawh mek a enfiah. Bawrhsap hian kawng enkawltu NHIDCL leh kawng siamtu Balaji Contruction hotute chu ṭha taka hna thawk turin a chah. Contractor-te chuan March 31, 2025 hmain blacktop hna zawh theih an inbeisei thu an lo hrilh.
Pêl/veh khap
Serchhip district magistrate Paul L Khuma chuan thupek chhuahin, Serchhip district-ah air gun/rifle, silai, sairawkerh leh hmanraw dang hmanga ramsa leh sava pêl/veh, kah leh man khap a nih thu a puang. Thupek zâwm lo chu Bharatiya Nyaya Sanhita, 2023 Section 223 hmangin hrem theih a ni.
SCDC ṭhukhawm
State Cooperative Development Committee (SCDC) chu nimin khan Secretariat conference hall-ah secretary H Lalengmawia kaihhruaiin an ṭhukhawm. Sorkar laipui duh dan anga Multi-purpose Primary Agricultural Cooperative Society tam zawk neih theih nana hmalak leh Cooperatiion kaltlanga Mizoram hmasawnna tur leh a bik takin thingtlang lama chengte hmasawnna ngaihtuahte an rel a ni.