Hmânlaia Mizo nunphung entir

Chapchàr Kût 2025 pualin Art & Culture department chuan nimin khan Falkawna Zokhuaah hmânlaia Mizo nunphung entirna, 'Live demonstration of Mizo typical life' an buatsaih a, adviser to chief minister TBC Lalvenchhunga, MLA-in a hawng.

Falkawn Zokhuaah hian zawlbuk, lal in, khàwnbáwl in, thirdéng in, pûm, mi naran in leh hmeithai in te a awm a; chu'ngah chuan Chapchar Kût live demonstration of Mizo typical life hnuaiah Mizo thuam leh hmanraw chi hrang hrang nen hmânlaia Mizo khawsak dan entir a ni. Naupang pawnto leh Mizo infiamna te, la deh dante entir a ni bawk.

Hmânlai Mizo nun dan entirnaah hian Melriat Middle School, Falkawna YMA, MHIP leh MUP-te'n hun an hmang a; vawiinah chhunzawma zawh a ni ang.

TBC Lalvenchhunga chuan, Mizote hnam anga an ṭhan lenna tur leh hmasawnna tluantling nei turin Mizo hnam ziaráng humhalha chawisan hmasak a pawimawh thu a sawi a, "Khawtlang nuam siam tur chuan Mizo nun ze mawi, aia upa zah thiamna, hawihhawmna, rinawmna leh tlawmngaihnate ṭhangtharte nuna tuh nun zel a pawimawh," a ti.