District council ṭhiah tawh pahniha MDC pension punna tur pawm a ni

Nimina Assembly session-ah Parliamentary Affairs minister Vanlalhlana put luh, 'The Mizoram (Pension for Members of the Defunct Mizo District Council and of the Pawi - Lakher Regional Coouncil) (Amendment) Bill, 2025 lungrual taka pawm a ni.

Bill pu luttu Vanlalhlana chuan, dan tihdanglam tura put luh tihdanglam hnuhnun ber chu kum sarih liam taah a nih thu sawiin, "February 2025 ang chuan district council ṭhiah tak pahniha MDC ni ṭhin pension la mek mi pariat leh MDC chhungte pension la (family pension) 35 an awm," a ti.

Parliamentary Affairs Minister sawi danin, MDC pariatte pension hlawh atan thla tin cheng nuai 2.38 leh family pension atan thla tin cheng nuai 4.49 sen ṭhin a ni. MDC pension-te'n thla khatah Rs 20,000 lain, kum tin 5%-in a pung a, Rs 35,000 aia sang lak theih a ni lo. Family pension chu thla khatah 10,000 niin, kum tin 5%-in a pung a, Rs 20,000 a pêl thei lo thung.

Minister-in dan siamṭhatna tur Bill a put luh ang chuan, MDC pension-te hlawh chu thla khatah Rs 40,000 niin, kum tin 5%-in a pung ang a, Rs 70,000 a pelh erawh a rem lo. An hlawh pangngai bakah thla tin medical assistance Rs 2,000 an dawng ang.

Family pension chu thla tin Rs 20,000 a ni tawh ang a, kum tin 5%-in a pung ang a, Rs 35,000 pêl lo tura tih a ni. Family pension-ah chuan medical assistance a tel lo.

Siaha bialtu MLA Dr K Beichhua, Lawngtlai West bialtu MLA C Ngunlianchunga leh Lawngtlai East bialtu MLA Dr Lorrain Lalpekliana Chinzah ten Bill put luha lawmthu an sawi hnuah lungrual takin an pawm a ni.