Mizorama bungraw lut tur dang

Nimin chhun dar 1 vel aṭang khan Lailapur leh Hailakandi-ah Mizorama lut tur bungraw phur lirtheite dan a ni a, Zophai leh Saihapui V-a Mizoram IR duty-te sawn chhuah phut vang nia thudawn a ni.

Vanglaini-in thu a dawn danin, nimin khan Cachar DC chu Saihaipui V-ah kalin, IR-te lak chhuah an nih loh chuan kawng dan a nih dawn thu a sawi a, a haw hnu lawkah Lailapur leh Hailakandi-ah kawng dan nghal a ni.

Mizoram aṭanga Assam lam pan tur lirtheite chu chhuk tlangtir zel a ni a, Lailapur-ah an dang lo. Mizoram lam pan tur bungraw phurte erawh chu he thu ziah lai thleng hian an dang a ni.

Assam leh Mizoram ramri buai avangin Lailapur-ah hian hun eng emaw chen Mizorama lut tur bungraw phur lirtheite dan a ni a, October 22, 2020 aṭangin an rawn lut ṭan leh a ni.