MZP bultumin Zoram Ni hman a ni

Mizo Zirlai Pawl General Headquarters, Aizawl huaihawtin nimin khan Dawrpui Multipurpose Hall-ah Zoram Ní hman a ni a; khuallian Rajya Sabha MP K Vanlalvena chuan, Mizorama Zo hnahthlak raltlante ngaih theih lohna leh hmuhsitna thu sawitute chu vai nationalism-in a chhum hminte an nih tlangpui thu sawi.

Zoram Ni hi India sorkarin kum 1966-a jet fighter leh bomb hmanga Aizawl beih ní, March 5-ah hman ṭhin a ni a, kum 2008 aṭangin MZP bultumin hman a ni ṭhin. Kumina Zoram Ni thupui chu 'Tho la, ding ta che' tih a ni.

MP K Vanlalvena chuan, Mizoram independence movement chu hlawhtling lo mah se, Mizote himna tur India Danpuiah tarlan a nih phah tih a sawi a, "Kan ram leh kan sakhua humhim hi kan mawhphurhna a ni. Tun hnaiah kan unau Manipur, Burma leh Bangladesh aṭanga rawn raltlante ngaih theih lohna leh hmuhsitna sawi a tam hle a, hetiang mite hi a tlangpuiin vai nationalism-in a chhum hminte an ni tlangpui," a ti.

Rajya Sabha MP chuan, "Tunah keini him angin lang mah ila, engtik ní-ah emaw chuan kan unau, tuna kan mikhualte hi kan la belh hun a la thleng lo ang tih a sawi theih loh," a ti a, chuvang chuan Mizorama Mizote chu chapo thei an nih loh thu a sawi.

India-in zalenna a sualnaah Mizo an tel loh avangin India Danpuiah Mizote himna tur a awm lo nia sawiin K Vanlalvena chuan, "Chuvangin, Mizo independence movement a lo piang a, Mizote'n kum 1966-a zalenna a puan hi jet fighter meuh hmanga hmeh hmih tum a ni hian movement nêp lohzia a tilang," a ti.

Zoram Ni hmannaah hian college zirlaite leh tlawmngai pawl aiawhte an tel a; Lengzem editor Vanneihtluanga'n thupui a sawi a, Zoram Ni puala article inziahsiak leh reel insiamsiak lawmman sem a ni bawk.

MZP president H Lalthianghlima pawhin thu sawiin, Zoram Ni aṭanga hnam hmangaihna nei thar turin mipui a sawm a, "Kan hnam tawrhna aṭangin hma lam i pan ang u," a ti a; kum 1966-a Mizoramin independence a sual India-in duh loa jet fighter hmanga a beih let avangin, Mizoram a intodelh hmaa enkawl chu India mawhphurhna a nih thu a sawi.

Mizoram ram ralmuang a ni chunga Enforcement Directorate (ED) leh National Investigation Agency (NIA)-te Mizoramah an sapatâl nia sawiin H Lalthianghlima chuan, "Pawi kan ti hle. Mizoramah duh duha an rawn tâl zel a nih chuan MZP-in nasa taka kan la dodal hun a awm ang. Fimkhur turin ka chah a ni," a ti.

MZP Headquarters, Lunglei pawhin nimin khan an pisaah Zoram Ni an hmang a, MJA leh political party aiawhte leh zirlaite an tel. Inkhawm hi Lunglei MZP vice president Albert Lalnunpuia’n a kaihruai a, adviser Lalpeksanga Chenkual-in thupui a sawi a ni.