Mimal lirthei hman theih loh

State Transport Authority (STA) chuan hriattirna chhuahin, passenger tax chawi lirtheite chauh man chawia hman theih a nih thu leh, mimal lirthei man chawia hman (hire) tir ṭhinte chu man chhuah an nih chuan dan anga hrem an nih dawn thu an tarlang.

STA chuan, Mizoramah chuan two wheeler taxi, auto rickshaw, four wheeler taxi, maxicab, bus leh rental car-te'n passenger tax an pek thu a tarlang a, "Heng lirthei hote chauh hi man chawia hman theih an ni. Hetiang a nih lai hian mimal, company/firm leh sorkar department ṭhenkhatte'n mimal lirthei (private registered vehicle) an hmang ṭhin tih hriat a ni a, mimal lirthei hire hi MV Act leh Rules kalh tlat a ni," a ti.

Tun hnuah chuan mimal lirthei hmang loa phalna nei ngei (passenger service vehicle) chauh man chawia hmang tawh tura chahin STA chuan, "Mimal lirthei neitu ṭhenkhat, lirthei lo inhmantir ṭhinte kan awm a nih chuan ti tawh lo turin kan inhriattir a, hriat chhuah an nih chuan dan anga hremna lekkawh tur a ni," an ti bawk.