Kuhva sawngbawlna din tum

Land Resources, Soil & Water Conservation (LRSWC) minister Lalthansanga chuan MNF member Lalrinsanga Ralte zawhna chhangin, Zamuang leh Chemphaiah kuhva sawngbawlna hmun (processing plant) din tum mek a nih thu nimin khan Assembly House a hrilh.

LRSWC Minister-in House a hrilh danin, Zamuang leh Chemphaia kuhva sawngbawlna dinna atan North Eastern Council aṭangin cheng vbc. 7.43 hmuh a ni tawh. He project hnuaiah hian kuhva rahte chu khawl hmangin a káwr kheh a ni ang a, khawl hmang vêkin tihro a ni ang. Kuhva rah hmin ṭhate ferment (skop) a ni ang a, kuhva hnah ro aṭangin thleng (plate/bowl) siam tum a ni.

Kuhva khehna káwr aṭangin leiṭha (organic manure) siam tum a ni bawk a, processing plant enkawl hna chu society-te kutah hlan chhawn tura ruahman a ni.