Kawthalo do beihpui thlakna hawng Kum 2014-ah khawthalo vangin mi 17 thi

Kawṭhalo vanga thihna a thlen lohna atana beihpui thlakna tur programme 'Intensified Diarrhoea Control Fortnight' chu nimin khan Mizoram hmun hrang hrangah hawn a ni. Aizawlah chuan Health minister Lal Thanzara'n Aijal Club-ah a hawng. Nikum khan Mizoramah kawṭhalo (diarrhoea) vangin mi 17 an thi tih tarlan a ni.

Lal Thanzara chuan, kawṭhalo chu natna tlangláwn leh huatthlala tak a nih thu a sawi a, "Nausen kum nga hnuai lam thihna thleng thin zaa sawm pakhat (11%) hi kawṭhalo vang nia chhût a ni. Kawṭhalo hi nipui boruak leh fûrpui chhoah a hluar ṭhin hle a; hei vang hian sorkar laipui pawhin kum 2014 aṭang khan kawṭhalo dona beihpui hi ram puma hman turin a duang ta a ni," a ti.

Health Minister tarlan danin, Intensified Diarrhoea Control Fortnight (IDCF) hman a nih chhung hian ASHA leh health worker-te'n an huam chhunga kum nga chin hnuai lamte chu an tlawh chhuak ang a, ORS an sem ang. Hei bakah hian nau pawmte pawh an tlawh chhuak ang a, nau hnute tui pek ṭhat pawimawhna leh nutrition pawimawhna hrilhin, naupang hriselnate an endiksak dawn a ni.

Nikum lama IDCF hman chu a hlawhtlinna hmuh zel a ni tih sawiin Thanzara chuan, "Hlawk lehzuala hun kan hman tlan ṭheuh theih nan thawktute zawng zawngte ka sawm che u. Kan hriatnate hi mi dangte tan ṭangkai taka kan hman chuan vantlang hriselnain hma a sawn ang a, chu chuan ram pum huapin rah ṭha tak a chhuah dawn a ni," a ti.

Reproductive and Child Health (RCH) state programme officer Dr R Lalthanga tarlan danin, India ram mipui zingah 12% chu kum 5 hnuai lam an ni a, kum 5 hnuai lam hi kum tin kawṭhalo vangin nuai 1.4 an thi ṭhin. Mizoramah chuan nikum khan kawṭhalo vangin mi 17-in nunna an chán a ni.

ICDF hawnna hi Health principal director Dr K Ropari'n a kaihruai a, khualzahawm, AMC chairman CT Zakhuma pawhin thu a sawi. Mithiamte'n hrang hrangte'n hriselna atana thil pawimawh chi hrang hrang an sawifiah a ni.