Health Minister-in Covid-19 vanga Nunna chán chhungte a tawrhpui

Health & Family Welfare department chuan nimin khan Covid-19 donaa an inbuatsaihnate Secretariat conference hall-ah an thlirho a; meeting kaihruaitu Health minister Dr R Lalthangliana chuan, Covid-19 vanga thi chhungte a tawrhpui thu a sawi.

Health Minister chuan, Covid-19 vei thi awm lo turin sorkarin theihtawp a chhuah thu sawiin, "Vawiin chhuna Mizorama Covid-19 positive nunna chán kan nei ta hi thinlung takin hrehawm ka ti. Anmahni enkawltute'n theihtawp tak meuh an chhuah a, an chungah lawmthu ka sawi. Nunna chán ta chhungte ka tawrhpui tak zet a ni," a ti.

Ṭhutkhawmah hian Covid-19 vanga nimina thi Sangkhuma sûnna atan minute khat chhung ngawi rengin an ding a ni.

Meeting-a tarlan danin, Mizoramah PPE a awm ṭha a, Rapid Antigen Test (RAT) hmanrua (kit 10,820 leh PPE kit 4,000 lei belh tura ruahmanna siam niin, thuneitute phalna lak a nih veleh bawhzui nghal a ni ang. ZMC laboratory-ah tluang takin swab sample endik a ni a, harsatna a awm lo. RAT kit lei khâwl sa chu sero-surveillance tih nan hman tum a ni a, rei lo têah kalpui tura inbuatsaih a ni.

October thla chhungin Covid-19 vei zirna-in aṭangin mi 54 leh office kaihhnawiah mi 33 hmuh chhuah a ni a; hri kài ṭanna chhui chhuah theih loh mi 51 an awm.

Sûlhnu mobile application sorkarin install tura thupek a chhuah chu smartphone hmang zawng zawngte'n hmang ṭangkai se an duh thu leh, chu chu contact tracing atan a ṭangkai theih an rin thu an sawi lang bawk.