KHAWTHLIR

Rokunga archive
Mizoram State Archives leh Rokunga Memorial Society ṭangkawpte'n Mizoram State Archive, Babutlanga hla phuah thiam, Rokunga bungraw dahṭhatna 'Private Archives' (almirah) an siam chu nimin khan a duh apiang tlawh theiha hawn a ni.

Thisen pe
Hrangbana College chuan nimin khan an college Golden Hall-ah blood donation camp an huaihawt a, Aizawl Civil Hospital tan thisen unit 143 an pe a, a petute zirlai mipa 87 leh hmeichhia 56 an ni.

Lusun khawhar
Mizo District Council hun laia District Council Member ni ṭhin, R Lalhuzauva (83), Chhinga Veng chu nimin zing dar 9:30 vel khan a thi a, vawiinah vui a ni ang. R Lalhuapzauva hi kum 1970 khan Phuldungsei bial aṭangin MDC member atana Congress ticket-a thlan a ni a, executive member niin, Revenue leh Finance a chang.

Nupui hâl
Vanlalthanmawia (23) s/o Biakthanga, Sangau Ramhlun chuan July 25, 2015 khan a nupui PT Lalbiakdiki d/o PT Lalbuaia, Sangau-III chu khawnvartuia leihin a hâl a, police-te'n an man nghal. PT Lalbiakdiki hi nau thla sarih mi pai lai a ni a, Sangau damdawi-ina enkawl hnuah Saiha District hospital-ah enkawl mek a ni.

DD DG thar
C Lalrosanga, Tuikual South chu Doordarshan director general atan tun hnai khan dah ngheh a ni. C Lalrosanga hian hun eng emaw chen director general hna hi thawh hnuah tun hnai khan a ngheta awm tura tih a ni.

Lawngin chesual
Nimin tlai khan Chawngte luiah Telsosora khaw mite chuanna lawng a chesual a, he thuziah lai thleng hian mi pakhat hmuh a la ni. Thudawn danin, lawngah hian mi 18 an chuang a, mi 17 chu chhanchhuah hman an ni a, pakhat chu zawn mek a ni.