Property Tax aṭangin nuai 19.08 hmu tawh

Aizawl Municipal Council (AMC) chuan nimin thleng khan Property Tax aṭangin cheng nuai 19.08 an hmu tawh. AMC hotute chuan, mipui nawlpuiin an rin aiin Property Tax an chawi tur chu a tlem an ti ṭhin a, chhiah a lut ṭha tih an sawi.

AMC hian The Mizoram Municipalities Property Tax Management Rules, 2014 angin June 16, 2015 aṭang khan Property Tax hi an khawn ṭan a, property 3,661 aṭangin cheng nuai 19.08 an hmu tawh. Chhiah hi AMC ward 19 zinga pahnihah khawn zawh a ni tawh a, ward pakhatah chuan nimin khan khawn zawh theih beisei a ni. Chhiah khawn tawh chinah Ramhlun North aṭangin a lut ṭha ber.

AMC hnathawkte chuan Property Tax hi mipuite'n an pek theihna atan an vengah an kal chilh a, a duh tan chuan AMC office-ah pawh pek theih tho a ni.

Ruahman lâwk dan chuan, July 29 aṭanga August 4 inkarah AMC Ward-IV ah an khawn dawn a, hemi huam chhungah hian Ramhlun South, Ramthar Veng, Ramthar North leh Aizawl Venglaite an awm a ni.