Khawthlang lam Kawrpuichhuaha Integrated Checkpost tur enfiah

Indo-Bangla Border Trade Centre atana ruahman, Kawrpuichhuaha Integrated Checkpost awmna tur hmun chu sorkar laipuiin a duhkhawp loh avangin tun hnai khan a kaihhnawih department hrang hrang aiawhte'n ram zau zawk sahthlâk dan tur an enfiah.

Kawrpuichhuaha Integrated Checkpost siamna tur hi May 27, 2015 khan Union minister of state for Home Kiren Rijiju chuan a tlawh a, checkpost dinna atana hmun ruahman hectare 9 vela zau chu a zîm deuha a ngaih thu a sawi. Chumi hnuah sorkar laipui aṭangin Integrated Checkpost dinna tura a tira ram hauh chu a zauh tâwk loh thu leh zau zawk ram mamawh a nih thu Mizoram sorkar hriattir a ni.

Sorkar laipui thupek bawhzui hian Trade & Commerce joint director HD Lalrintluanga hoin sorkar department hrang hrang aiawhte chuan July 21, 2015 khan ram zauh dan tur an enfiah a; a tira hectare 9 ruahman chu hectare 18 velah zauh theih an beisei.

Sorkar official-te chuan Integrated Checkpost tur an enfiah bakah, ramri depa India leh Bangladesh inkalpawhna lei dawhna hmun tur pawh an enfiah nghal a; sorkar laipui duhdan angin, Integrated Checkpost aṭanga hmun remchang hnai berah ram lei hi dawh tum a ni.

DoNER-in a tarlan danin, sorkar laipui chuan ramri hrul hmun 13-ah Integrated Checkpost siam a tum a, chuta tan chuan cheng vbc. 635 ruahmanin, Kawrpuichhuaha checkpost siamna atan bik cheng vbc. 27 ruahman chhin a ni. Sum dah zat dik tak erawh hriat a la ni lo.

Integrated checkpost siamna tur project hnuaiah hian passenger terminal building, currency exchange, internet facility, cargo process building, cargo inspection shed, warehouse/cold storage, quarantine laboratory, CCTV/PA system, isolation bay, parking, cafeteria leh thil dangte siam tur a ni.