MR Bill atana sum hmang tam zualte Health Services, HME, School Education

Sorkar kum liam ta, 2014-15 chhunga Mizorama sorkar hnathawkte'n medical reimbursement (MR) bill atana sor­kar sum an hman ral chu cheng vbc. 81.7 a ni. A hmang tam zualte chu School Education department leh Health department pahnih - Health & Family Welfare leh Hospital & Medical Education department-te niin, nuai 1,871.21 an hmang.

Thu dawnnain a sawi danin, kum 2014-15 chhunga Health & Family Welfare department hnuaia Mizoram hmun hrang hrang 20-a thawktute MR bill zawng zawng belhkhawm chu Rs. 5,62,81,524 niin, directorate bika thawktute bik MR bill chu Rs. 11,597,311 a ni a, belh­khawm­in Rs. 6,78,78,835 a ni.

Hospital & Medical Education department-a MR bill an pek zat chhût chhuah chu Rs. 2,35,62,771 a ni a, directorate bikah mi 49-in Rs. 43,48,957 an hmang. Health department pahniha thawkte'n kum 2014-15 chhunga MR bill atana an sen zawng zawng chu Rs. 9,14,41,606 a tling.

Health department-ah hian MR bill atana sum sênte chu budget estimate-a an ruahman sain a daih lo ṭhin nia thu dawn a ni.

School Education department chuan a hnathawkte MR bill atan 2014-15 chhung khan cheng nuai 956.80 an hmang. MR bill an pekte zinga Mizoram chhunga inenkawl mi 1,673 tan non-plan sum nuai 617.06 leh mi 258 tan plan sum nuai 116.10 pek a ni a; Mizoram chhunga inenkawl mi 1,931 tan nuai 733 an hmang.

Phai lam pantu mi 283 tan non-plan sum nuai 193.75 leh mi 40 tan plan sum nuai 29 an hmang a; phaia kal zawng zawng mi 323 tan nuai 223.66 an sêng. Mizoram chhung leh phai lama inenkawl zawng zawng chu mi 2,264 niin, sum sen zawng zawng chu nuai 956.80 a ni.

School Education department hian kum 2014-15 khan MR bill atan budget-ah a tirah chuan cheng nuai 726.80 an dah a, mahse an indaih loh avangin Supplementary Demand hmangin nuai 230 an dah belh leh a ni.