Lungleiah faina beihpui thlakna tur hawng

Sorkar laipuiin hriselna leh faina kawnga India ramin hma a sawn theihna tur a duan, 'Swacch Bharat Mission' hnuaia bulṭanna tur hawnna hun July 24 khan Lungleia Saikuti hall-ah buatsaih a ni.

Swacch Bharat Mission kick off huah hian khuallian addl. DC H Lianzela chuan, Swacch Bharat thiltumte tihlawhtling turin, tifaitu nih theih loh pawhin tibawlhhlawhtu tal nih loh a pawimawh thu sawiin, "Khawtlang hruaitute leh mipui vantlang hrim hrim pawh faina leh hriselna kawnga hmasawn zel turin inzirtir ang u, a ti a, tunlai thiamna hrang hrang hmanga nunphung changkang leh fai zawk nei tura midangte fuihtu nih tum ṭheuh turin mipuite a sawm.

Lunglei DUDO Albert Vanlallian­tluanga pawhin thu sawiin, "Swacch Bharat Mission hi thlur hnihin kal­pui mek a ni a, thingtlang lamah SBM (Gramin) chu PHE department-in an enkawl laiin khawpui (Urban) huam­chhungah chuan UD&PA Department-in a enkawl thung. He hmalakna hi India Hnam Pa Mahatma Gandhi piancham 150-na October 2, 2019 thleng kalpui tur a ni," a ti.

Swacch Bharat Mission (Urban) hmalak tum dan ṭhenkhatte chu - chhung­tin ek in thianghlim leh ṭha neih tir ṭheuh te, vantlang inthiarna mumal, ṭha leh thianghlim zawk sak te, bawlhhlawh felfai zawk leh thianghlim zawka sawngbawlna tura hmalakte leh mipui/mitin faina leh ek Iin thianghlim neih kawnga hma la tura inzirtirna leh infuihna (awareness campaign) neihte a ni.