District hrang hrangah IDCF hawn a ni
Nimin khan district khawpui hrang hrangah Intensified Diarrhoea Control Forthnight (IDCF) hawnna hun buatsaih a ni.
Lungleiah chuan IDCF hawnna hun hi Doctors Conference Hall-ah hman a ni a; khuallian, Lunglei DC Ashish Madhaorao More chuan, santên leh natna dang pumpelh turin faina leh thianghlimna ngaih pawimawh hmasak a ṭul thu a sawi.
Lunglei DC chuan, "Fortnight chhungin kawṭhalo vanga thi kum 5 hnuai lam an awm loh nan Health department chauh ni loin, mipui zawng zawngte kan ṭanrual thiam a ngai," a ti a; a enkawl dan dik leh ṭha hre lote hnenah a zau thei ang berin hrilh zel turin kalkhawmte chah.
Saiha-ah chuan Health Main Centre-ah MADC chief executive member RT Zachono hoa hun hman a ni a; RT Zachono chuan Saiha district-ah chuan nausen thi tam viau mah se, kawṭhalo vanga nunna chán an la awm loh thu a sawi.
MADC CEM chuan, "Mithiamte sawi danin, kawṭhalo hri hi boruaka lêng ni loin, kan ei leh in aṭanga kan kaite a ni ṭhin a, hei vang hian naupangte hnenah thianghlimna zirtir hi kan zavaia mawhphurhna a ni," a ti a; Health department hnathawkte chu thawhrimna leh inpumpekna nena thawk turin a ngen.
Mamitah chuan additional DC Lalbiaksangi'n CMO office-ah a hawng. Lalbiaksangi chuan sorkar laipuiin kawṭhalo beihpui thlakna a duang chhuak chu lawmawm a tih thu sawiin, "Fûr ruahtui tlak nasat lai hi kawṭhalo vei tam hun a ni a, a bik takin naupang kum 5 hnuai lamah a tam ṭhin. Fortnight hman a nih vang hian kawṭhalo venna kawngah kan district-in nasa taka hlâwkna kan neih ka beisei,” a ti.
Lawngtlaiah chuan IDCF hi chief medical officer pisaah hawn a ni. A hawngtu LADC executive member F Hranglura chuan, mipuite chu hriselna hlutzia hria a, hriselna an neih theih nana thawktute lo ṭanpui tur leh mithiamte thurâwn anga engkim ti ṭhin turin a chah.
Intensive Diarrhoea Control Fortnight hi kum 2014 aṭangin India ram chhung hmun hrang hrangah kalpui ṭan a ni a, thupui ber chu ‘Zero childhood deaths due to diarrhoea’ (Kawṭhalo vanga naupang thihna tihtawp) tih a ni.