MNYF-in MPYCC thil phût sawifiah

Mizo National Youth Front (MNYF) chuan thuchhuah siamin, Congress ṭhalaite'n ICU khum leh ventilator siam belh tura sorkar an phût chu thil an hriat chian loh vanga an ngaih thu leh, an thil phût chu sorkarin a tih sa reng niin an tarlang.

MNYF chuan, hripui léngin zual lam a pan a, chumi do tur chuan sorkar a inbuatsaih mek zel niin an sawi a, "Congress ṭhalai lamin ICU khum leh ventilator neih belh an phût hi sorkarin a tih sa reng tawh, peihfel ṭêp tawh a nih thu hria se kan duh hle," an ti.

Health department thuchhuah MNYF-in an tarlang chhâwn danin, sorkar damdawi-in hrang hrangah ventilator 70 a awm sa a, hripui lên hnua sorkarin a dawn lehte nen ventilator 199 neih mek a ni a, a vaia hman theih turin bun mek a ni. Civil Hospital, Aizawl ICU, khum 19 dah theih tura peih a ni tawh a, thawktu lak a nih veleh hman a nih dawn. ZMC-ah ICU khum 14 awm mek bakah, khum 22 ruahman a ni bawk.

MNYF chuan, sorkarin hma­lak­na fel tak a nei nia sawiin, lawmawm an tih thu an tarlang a, "Mipui hriselna ngai pawimawha sum mamawh ngaihtuahsak ṭhin Chief Minister, Health changtu minis­ter-te kan chhuang hle a ni," an ti.

MNF ṭhalaite chuan, Congress sorkar laiin, June ni 20, 2011-a ZMC Multidisplinary Research Unit (MDRU) dinna turin ICMR aṭangin cheng vbc. 6 an rawn pe nia sawiin, "1st instalment cheng vbc. 2 an hman dik tâwk loh vang nge, 2nd instalment tur vbc. 4 min rawn pe duh ta lo a ni," an ti bawk.