Vawiinah Bru kir duhte enfiah dawn

Tripura-a Bru Relief Camp lian ber, Naising­para-a awmte zinga Mizorama haw duhte chu vawiin aṭangin enfiah an ni dawn a, enfiahna hun hi August thleng hawn a ni ang.

Naisingpara camp-ah hian Mamit, Kolasib leh Lunglei district-a mite an awm a, kir duhte enfiah turin Mamit aṭangin SDC pahnih Lalbiakfela leh Gaston Vanlalhriatpuia, Kolasib aṭangin SDC Lalhmingliana leh Lunglei aṭangin SDC pahnih Daniel Saila leh Vanlal­chhuanliana te an kal. Kir duh an awm chuan August 10-21 inkarah hruai kir an ni ang.

He camp-ah hian chhungkaw 2,700 vel an awm a, Mamit district a mi an tam ber a ni.

Zawhna chhangin Mizoram Bru Displaced People Forum (MBDPF) president A Sawibunga chuan, kir duhte enfiah tura Mizoram aṭanga official kalte chu ṭha tak puih an tum thu a sawiin, "Camp-a mite chu lak let an nih huna anmahni dahna tur ruahman leh anmahni ṭanpuina sum leh ration pek dan turte pawh hrilhfiah tel vek an ni," a ti a, dah tumna hmunah an eizawnna tur ram pek an nih dawn loh avangin haw duh an tam a rin loh thu a sawi.

Tarlan tawh angin kir duhte enfiah hna hi Kaskau, Khakchangpara, Hamsapara leh Asapara camp-ah neih a ni tawh a, Mizorama kir duh an awm lo.