Republic Vengin khai hlum phût

Republic Veng Joint Action Committee (JAC) chuan thuchhuah siamin vawiin hi January 9, 2015-a Sangliansiamate chhungkua mi panga thattu Laltlanchhuaha tan final hearing tih tarlangin, khaihlum ngei an phut.

Sangliansiamate chhungkaw tawrhna an theihnghilh tawh dawn lo tih tarlangin Republic Veng JAC chuan, "Kan rilru a na thar hle. Râwng taka mi panga lai mai that a, naupang rilru thianghlim tak pawh zuah loa hmelma ang maia diriam taka nghaisatu Laltlanchhuaha chunga kan thuchhuah tawh 'he tualthattu hi khaihlum ni rawh se' tihah hian kan la ding nghet tlat a ni," an ti.

Republic Veng JAC chuan Laltlanchhuaha chu Republic Veng khua leh tui nihna an hlihsak tawh tih tarlangin, "A nung chungin emaw Republic Veng chhungah lak luh kan remti lo," an ti a, tualthahna rapthlak tak chungchangah dik taka rorel a nih theih nana dâltu an awm a nih chuan khawtlangin a ṭul angin an hmachhawn zel tur thu an sawi.