MPCC-in Covid-19 vei thi pawi an ti

Mizoram Pradesh Congress Committee (MPCC) chuan thuchhuah siamin, Mizoramah Covid-19 vanga thi an awm ve ta chu pawi an tih thu leh, hripui veia thi Sangkhuma, Dawrpui-in a kalsan tak a chhungte an tawrhpui thu an tarlang.

MPCC chuan, "Mizoram chhung ngeiah Covid-19 vanga thihna a thleng ve ta hi pawi kan ti tak zet a, mitthi chhungte kan tuarpui tak zet a ni. Damdawi-in lama thawkte thawhrimna kan hriatpui reng bakah Dawrpui YMA-in thinhrikna nei hauh lo leh sorkar dan siamte zâwm a, SOP-in a sawi ang thlapa ruang an buaipui hi a ropui kan ti tak zet a ni," an ti.

Congress party chuan, Mizo­ram sorkar chu thutlukna a siam dawnah a nghawng theihte ngun taka ngaihtuah chungin thutlukna siam ṭhin se an duh thu sawiin, "Sorkarin thutlukna a siam sualin nghawng a neih natzia leh mipuiin kan tawrh nasat theihzia kan hriat tawh avangin fimkhur lehzuala sorkar a kal ngei kan beisei," an ti. Covid-19 chu thlasikah a na zuala ngaih a nih avangin Mizoram mipuite fimkhur lehzual turin an chah bawk.