KHAWTHLIR

Lawngtlai bawrhsao Dr Andrew H Vanlaldika hoin nimin khan DC conference hall-ah Lai Autonomous District Council inthlanpui awm tura nodal officer tura ruatte'n inthlan tur an sawiho. LADC inthlan hun puan la ni lo mah se, inbuatsaihna a kal mek a; October 19, 2020 khan draft electoral roll tihchhuah niin, siam rem ngai hrang hrang siam rem a nih hnuah, final electoral roll chu vawiin hian tlangzarh a ni ang.

Synod Hospital Covid-19 Task Force chuan nimin khan thuchhuah siamin, vawiin zing dar 9 aṭangin Hospital emergency service hawn a nih dawn thu an tarlang a; damlo admit ngaite pawh admit theih a nih dawn thu an tarlang bawk.

Kolasib District Level Standing Committee chu nimin khan bawrhsap Dr H Lalthlangliana hoin DC conference hall-ah an ṭhukhawm a, Electoral Roll Special Summary Revision atana inruahman lâwkna kalpui mek leh kalpui zel dan tur an sawiho. Village council siam tharte tan polling station awmna hmun turte ruahman a ni bawk.

LADC deputy chairman LR Dingliana Chinzah chuan, LADC MDC 12-te chu bàn an nih lohna chhan tur sawifiah turin October 26 khan a hriattir a, ni 15 chhung hun a pe. LADC Dy. Chairman-in insawifiah tura a tihte chu - Congress MDC pali, tun hnaia MNF party zawmte leh Congress MDC dang pariat, tun hnaia LADC-a Congress Legislature Party aṭanga BJP Legislature Party dintute an ni.

State Referral Hospital-ah nimin khan Covid-19 vei mi pakua dah luh an ni a, mi 54 enkawl mek an ni. SRH-ZMC Bulletin tarlan danin, mi 54 zinga pali chu ICU-ah an awm a, an zinga pathum chu ventilator hmantir niin, pakhat dang chu oxygen pek a ni a; Isolation ward-a awmte'n harsatna an nei lo. Covid-19 vei rinhlelh thila nimina mi pathum dah luh zinga pakhat chu ventilator hmantir nghal a ni bawk.