NLUP hnuaia sangha chi supply dan ACB chhuitir turin CM-in a hriattir

Chief minister Lal Than­hawla chuan NLUP hnuaia sangha chi supply dan Anti Corupption Bureau (ACB) chhui chiantir turin Vigilance department a hraittir.

July 6, 2015 khan Setlakzau Farmers Association secretary John Vanlalchhuanga chuan Chief Minister Lal Thanhawla hnenah, 'NLUP pawisa hmanga Fisheries department sangha chi sem tura supplier-te chhui chianna' tih thupuia hmangin lehkha a thawn a; CM Hawla chuan bawhzui tlaka a ngaih avangin, July 17, 2015 khan Vigilance Secretary chu he thil hi ACB-te a rang thei ang bera chhuitir turin a hriattir a ni.

He thil kal zelah hian Fisheries Secretary chuan Fisheries Director hnenah July 21, 2015 khan lehkha thawnin, NLUP Pilot Project cum Fish Culture Scheme chu tihtawp a nih thu leh sangha chi supply-tu Zoram Fish Production Centre leh Mizofa Feed Seed Farm chu chhui chian an nih hma chu pawisa pe lo turin a hriattir.

John Vanlalchhuanga'n Chief Minister hnena lehkha a thawnah hian, NLUP hnuaia Fisheries department-in sangha chi supply tur an thlan danah thil fel lo awma a hria thu a tarlang a, "Tuna NLUP pawisa hmanga Fisheries department-in supply order May 15, 2015-a an pek chhuah nen benificiary-te'n vawi hnih sangha chi dawng tur an nih laiin, finfiah theih chinah chuan vawi khat chauh kumin hian kan la dawng a ni," a ti.

John Vanlalchhuanga tarlan danin, Aizawl district bikah chuan sangha chi sem zo vek tawh angin supplier-te'n bill an thehlut tawh a; chutih laiin, supply order-a a inziah angin a hmunah sem a ni lo.

NLUP Implementing Board (NIB) secretary James Lalrin­chhana'n Fisheries director hnena lehkha a pek, Mizoram puma NIB-in common carp fish seed rate atana a pawm Rs. 4.40 tih chu thu dik lo a ni a, Serchhip leh Champhai district bika tana tih a ni.

Hetih lai hian, March 10, 2015-a Chief Secretary hoa SPAB ṭhukhawm chuan, common coap milimetre 100 chu a to berna Saiha district-ah Rs. 1.70 ni turin an bituk a; he rate hian Fisheries department hnuaia sangha chi supply zawng zawng, NLUP leh RKVY-te pawh tiamin a huam vek a ni.