KHAWTHLIR

DGP sawn
Mizoram director general of police Dharmendra Kumar chu Delhi-a awm tura sawn a ni. DGP sawnna thupek hi Ministry of Home Affairs chuan July 24, 2015 khan a tichhuak a; a thlaktu tur ruat a la ni lo. Mizorama IPS officer dang pahnih - ACB director Virender Singh leh Serchhip SP Romil Baaniya te pawh Delhi-ah sawn an ni.

Kawng siam tha
Vaivakawn Local Council huaihawtin nimin khan Vaivakawn leh Bazaar Bungkawng inkar kawng chhe lai hnatlangin an thawm ṭha. Kawng chei nan hian Vaivakawn LC, Vaivakawn Taxi Welfare leh a bul hnaia chêngte sum an thawh khawm a, PWD-in lung an thawh bawk.

Vantlang hna thawk
Bethlehem Bial KṬP chuan bial huapa vantlang hna thawh an rel angin, Inrinni khan TNT, Zuangtuiah hnatlang an nei a, in sak, insûk leh lei laih hna an thawh bakah, KṬP member-te buhfai thawh khawm an pe.

FOSDEM din
Saihaa mi ṭhenkhatte chuan July 24, 2015 zan khan Saihaa New Skylink Vision office-ah Forum for Social Development of Maraland (FOSDEM) an din. FOSDEM-ah hian chairman chu K Riachho a ni a; MADC huam chhung bika hmasawnna tur leh harsatna sukiang tura din a nih thu an puang. Pawl an din rual hian, an website, www.fosdem.in an tlangzarh bawk.

BCM leh CM
Baptist Church of Mizoram (BCM) hruaitute chuan July 24 khan an president Rev C Ngurhnema hoin chief minister Lal Thanhawla a chenna bangla-ah an hmu a, ram pum huapa ṭawngṭai ni 'State Day of Prayer' chungchang an sawipui. BCM hian an Assembly-a kum khatah vawi khat tal ram tana ṭawngṭai ni bik neih ni se, tih an rel an bawhzui a ni.

Ar notê sem
AH&Vety department chuan Inrinni khan Kelkang khuaa ar vulh thlangtu chhungkaw 19 hnenah ar notê 50 leh ar chaw kg. 60 ṭheuh an pe. Ar dawngtute hi ar vulh tura thil pawimawh hrang hrangte zirtir nghal an ni.

Zirlai thar lawm
Tuipuiral Zirlai Pawl chuan, Inrinni khan Aizawla IPR Auditorium-ah Freshers Social 2015 an hmang a, parliamentary secretary Joseph Lalhimpuia'n a hmanpui.

Hmunhmá enfiah
Parliamentary secretary TT Zothansanga chuan, Inrinni khan Champhai Zote-a Champhai District Court sakna hmun tur tlawhin ruahmanna kal mekte a enfiah. TT Zothansanga hi Champhai DC H Lalengmawia leh chief judicial magistrate R Lalduhawmi ten an ṭawiawm.