Armed Veng-in football-a champion an lawm

Armed Veng branch YMA chuan Inrinni khan Central YMA Football Tournament, 2015-a an champion an lawm a, Home minister R Lalzirliana leh Finance minister Lalsawta ten an hmanpui.

Champion lawmna hi an branch YMA vice president KC Vanlalruata'n a kaihruai a; R Lalzirliana chuan, thiamna ringawt a tâwk loh thu sawiin, infiammite chu an nun uluk turin a chah a, “Mithiam tak tak zuin a tih ât bualte pawh awm theih a ni. Chu'ng mite chuan zah an phû lo ṭhin. Thiamna neih ringawt loin, nun ze mawi neih hi thil pawimawh tak a ni,” a ti.

Dâwt sawi mai mai a ṭhat loh thu sawiin R Lalzirliana chuan, “Politician zingah kan hmui thu dik lo sawina atana hmang an tam hle. Tun hmaa sawi ṭhin ang ni lo sawi mai mai hreh lo an tam,” a ti a; thudik lo sawi chu a tlo loh thu a sawi.

Khualzahawm, bialtu MLA Lalsawta chuan, YMA football-a an champion lawmna atan Armed Veng YMA building chhawng khat sak belhna atan a MLA fund aṭangin cheng nuai 10 pek a tiam a ni.

Inlawmna thu sawitu, Armed Veng branch YMA president R Lalawmpuia chuan, Armed Veng chuan YMA Football Tournament bakah, veng/khaw chei mawi ber lawmman leh NECS Cup-ah pakhatna dinhmun a hauh thu a sawi a, "Hetianga hlawhtlinna kan vengin a chang hi ruai nena lawm ngei a phûa kan hriat avangin, hetiang hun hi buatsaih kan ni," a ti.

Armed Veng branch YMA hi YMA Football Tournament-a champion hmasa ber leh champion ngun ber an ni a, ṭum nga an champion tawh a ni.