2014-2015 ah sorkar hnathawkte'n Ṭum 3,184 phai damdawi-in an pan

Sorkar kum liam ta, 2014-15 chhung khan Mizoram sorkar hnathawkte'n damlohna vangin Mizoram pawna damdawi-in hrang hrangte ṭum 3,184 an pan a; chu'ng zingah chuan School Education department-a thawkte kal tam berin, ṭum 347 an kal.

RTI Act hmanga zawhna, Health department SPIO chhannaa a lan danin, sorkar hnathawkte'n damlohna vanga phai lam damdawi-in an pan dawnin Health department-ah an dil hmasa a; Health department lamin damlo hming, a thawhna department, damdawi-in an pan tur leh an natna leh ṭul dangte an tihfel hnuah an kal ṭhin.

Sorkar hnathawk phai lam damdawi-in pantute zingah mi pakhatin ṭum hnih/thumte an kal a ngaih ṭhin avangin, vawi 3,184 kal hi a mihring zat a ni lo.

Sorkar hnathawk zinga Mizoram páwna damdawi-in pantu tam ber dawttu chu Health & Family Welfare departmentan ni a, ṭum 320 an kal a; Home department-in dawt lehin, ṭum 273 an kal. Ṭum 100 chuang kal nei department dangte chu - Higher & Technical Education ṭum 207, PWD ṭum 179, Power & Electricity ṭum 139 leh PHE department chuan ṭum 105-te an ni.