Central Jail-a táng tlân chhuak a thi

Police-in bike rûk chîng an man, Lalngaihzuala s/o Dohranga, Keifang chu July 23, 2015 khan Central Jail aṭangin a tlan bo a; nimin zing dar 3:30 vel khan Armed Vengah ruihhlo overdose (OD) vangin a thi.

Zonuam Police Outpost duty-te sawi danin, Lalngaihzuala hian Aizawla police station leh Saitual Police Station-ah thubuai eng emaw zat a nei a; July 23 khan Court-ah hruai a ni a, Central Jail-a an lut leh chu a awmna ward pan loin, zung tura insawiin a kal hrang a, chuta ṭang chuan a awmna chin hriat a ni lo.

Lalngaihzuala hian jail hungna lung bang ft. 12-a sang láwn liamin, a tlan chhuak nia hriat a ni a, a chhuak lai hmu an awm lo. A tlànbo hnu hian Mizorama police station hrang hrang hriattirin zawn nghal a ni. Amah hi Aizawl leh Saitual leh a chhehvelahte bike a ru ṭhin a, siam danglamin a hralh chhawng leh ṭhina hriat a ni.

Lalngaihzuala hi zawn a nih mek laiin, nimin zing khan Armed Venga police quarter-a ṭhianpa te inah a thi a, ruihhlo vanga thi nia hriat a ni. Nimin vêk khan postmortem a nih hnuah an khuaah thawn a ni.