BCM-in pastor nupui chungchang sawifiah

Baptist Church of Mizoram (BCM) General Secretary chuan BCM Administrative Committee thuchhuak angin, an pastor-te nupui, hna neite chungchanga BCM Assembly thurel dan leh thil awm dan a puang nawn. Kohhran mite rilru tibuai thei zawnga thu léng vel a awma an hriat vangin kohhran mite an hriattir nawn leh tih a tarlang.

BCM General Secretary tarlan danin, BCM chuan kohhran enkawl hna chu pastor-te tan chhungkuaa thawh thamah a ngai a, vawi eng emaw zat BCM Assembly-ah sawiho a nih hnuah bial vawngtu pastor-te chuan an thawhna hmunah an nupuite an hruai ngei tura tih a ni. Kum 2015 hnu lamah chuan pastor/minister nupuite chu sorkar hna leh hna dang, hun pum sénga thawh phal a ni lo ang, tiin kum 2008 BCM Assembly chuan a lo pawm tawh a ni.

BCM Assembly thu­chhuak chu a taka hman a nih dawn, kum 2015 Assembly-a ngaihtuah nawn leh turin Lunglei South ABC-in an thlen leh a; kum 2008 hma lama pastor/minister nupui, sorkar hna emaw, hna dang emaw thawk nghet tawhte chu an thawh chhunzawm zel remtihsak a, kum 2008 hnu lama mite erawh chu April 1, 2015 aṭangin báng se, tiin thu a thehlut a ni. Lunglei South ABC thu thlen chu BCM Assembly chuan a hnawl a, kum 2008 Assembly thu dah tawh chu a kaltlang ta zel a ni.

BCM General Secretary chuan, an kohhran rorelna sang ber thuchhuak chu tihhlawhtling turin pastor ṭhenkhat, an nupuite sorkar hna leh hna dang thawkte chu an insingsa mek tih a tarlang.