Serchhip district-a khaw 31-ah Naupang sikul kái lo 92 an awm

Serchhip district chhungah naupang kum 6-14 inkar sikul kái lo mi 92 an awm mek a, mipa 53 leh hmeichhia 39 an ni.

Central YMA leh SSA Mission-in thawh dunna thuthlung an siam bawhzuia YMA sub-headquarters, Serchhip-in Serchhip district an zir chiannaa a lan danin, naupang kum 6-14 inkar sikul kái lo zingah sakhuana vanga an nu leh pate'n sikul kal leh lehkha zir an phalsak loh an tam ber.

Serchhip district-a khaw 31-a YMA branch 69-a zir chianna neiha naupang sikul kài loh chhan dangte chu - chhungkaw reitheih vang te, nu leh pate'n an ngaihsak tâwk loh vang te, thiam theih loh vang te, hrisel loh vang te, sual leh luhlul vang te, rilru leh taksa lama rualbanloh vangte a ni.

Serchhipa SSA hotute chuan, naupang kum 6-14 inkar, chhan hrang hrang vanga sikul kái lote chu zir chian an nih hnuah, District Education Committee-ah an chungchang leh sikul an kal theih dan tur ngaihtuah a nih tur thu an sawi.