Mizoramah kawngpui zauh hna thawk mek

World bank sum hmanga Champhai leh Zokhawthar inkar kawng km. 27-a thui leh Lunglei district-a Chhûmkhûm leh Chawngte inkar kawng km. 42-a thui, double lane tura zauh hna chu ngawrh taka thawh mek a ni.

PWD hotute sawi danin, Champhai-Zokhawthar kawng zauh hna hi Tarmat Ltd., Mumbai an khawih a, a siam nan cheng nuai 13714 ruahmkan a ni. December 2014-ah hna an thawk ṭan a, June 2018-a zawh tur a ni a; Champhai khaw tawn tirha Police checkgate bul aṭangin an lai ṭan a, Zotlang aṭanga Mualkawi thlengin an bung mek. Km. 14 vela thui an khawih tawh a, km. 9 vel an lai zo tawh. Kawng hi a blacktop chin metre 7-a zau tur a ni.

Chhûmkhûm leh Chawngte inkar kawng double lane-a siam hna chu JKM Infra. Project Ltd., Noida-in an thawk a, cheng nuai 24565 ruahman a ni. December 2015-ah hna thawk ṭanin, kum li chhunga zo tura tih an ni a; hmun hrang hrangah kawng an lai zau mek a, kawng laih zauh bakah, blacktop, culvert, retaining wall leh tuihâwk luankawr siamte an thawk vek dawn a ni.

Serchhip-Thenzawl-Buarpui kawng km. 55-a thui laih zauh leh a siam hna pawh Asian Development Bank aṭanga sum hmuh hmangin Tantia Construction Ltd.-in an thawk mek. He kawng siam nan hian cheng nuai 20451 ruahman a ni a, December 2014-ah thawk ṭanin, December 2017-a zo tura tih an ni.

PWD hotute chuan, Serchhip-Thenzawl-Buarpui kawng siam tur chu double lane a tling dawn lo a, intermediate road an tih ang chi, a blacktop chin chu metre 5-a zau tur a ni a, chu chu Aizawl-Thenzawl-Lunglei World Bank road ang tiat a nih thu an sawi.

Lengpui bul, Lengte aṭanga Kaladan Multi Modal Transit Transport Project (KMMTTP) kawngpui pawh tura kawngpui thar sial tumah pawh hma lak mek a ni a; Lee Associate, South Asia Consultancy Service, Delhi-in survey an ti mek.

Kawngpui thar sial tum hi World bank sum hmanga thawh tum a ni a, Lengte aṭangin Lunglei Buarpui tlangdung zuiin Chawngte leh Lawngtlai district-a Diltlang leh Bungtlang South-te a tlawh ang a, KMMTTP kawngpui a pawh dawn a ni. Mahse, kawngpui sialna tur hi Bangladesh ramri dep a nih avangin sorkar laipuia Defence Ministry leh Home Ministry-te phalna lak hmasak phawt a ni a; anni'n an phalsak hnuah surveuy tih mek a ni a, survey tih zawhah detail project report siam a ni ang.