CM-in thupuiah taimâk nei turin a chah

Chief minister Lalduhoma chuan, amah leh minister-te Mizoram tan an thawhrim thu sawiin, Mizoram leh ram pawna Mizo mipuite chu thupuiah taimak nei turin a chah.

CM Lalduhma hian nimin khan Lammuala Chapchar Kût hmannaah thu sawiin, "Sorkarna kan chan ni aṭang khan mut kham ni hi vawi khat mah ka la nei lo. Zoram tan, in tan, ka hun zawng zawng leh ka theih zawng zawng a tam thei ang ber hman ka duh a ni. Chutiang bawkin ka ṭhiante pawh an ni, kan zavaiin kan thawk rim a ni," a ti.

Chief Minister chuan, "Kan sorkar hnathawk zawng zawngte pawh hi rim takin tunah hian an thawk mek a ni. Kan zavai hian kan eizawnna ṭheuhah tih tak zet kan chhuah chuan he hnam hi a ropui ang," a ti a, Pathian pawh chawimawia a awm tur thu a sawi.

Khawvel hmun tinrenga awm Zo fate chu thupuiah taimak nei tura chahin CM chuan, "Kan hnathawh chu a hniam emaw, a sang emaw, kan phak tâwk zela Pathianin min hûnna hi Pathian rawng kan bàwlna a ni tih hriain, tu mah zelthel suh u," a ti.

Lalduhoma chuan, ṭhalai thawh chhuah nei si lo, nalh tak taka inchei a, chhuah dawn apianga an chhungte hnena pawisa dil ringawt ṭhinte chu sim turin a chah a, "Biak in aṭanga hnai têah in in a awm a, inkhawm turin bike-te'n in kal, a ṭul lo, kein kal rawh u. I taima ang u," a ti a; Isua'n thatchhiat a duh lo a, taimak a ngaihsan thu a sawi.

Chief Minister chuan, ni 100 inhlawhna te, khawtlang leh kohhranah hnatlang hrang hrangte a awm thu sawiin, "Hengahte hian kan ṭhalaite hi thawk nasa tur, hma hruai tur kan ni tih kan inhriat thar a ṭha hle," a ti.