KHAWTHLIR

Minister tinin road map an nei

Planning & Programme Implementation changtu chief minister Lalduhoma chuan MNF member Lalrinsanga Ralte zawhna ziaka chhangin, minister tinin an department enkawl dan tur road map an neih vek thu a tarlang a; chutih rualin, confidential document a nih avangin pek chhuah a rem loh thu a tarlang bawk.

Meth kg. 48 man

Excise & Narcotics department leh Narcotics Control Bureau (NCB) thawk dun chuan March 6, Ningani zan dar 9 khan Khatlaah Munglamtuanga (33) s/o Tungbin Sian Khanlala, Hrianghmun, Champhai district leh Joseph Hmangaihzuala (49) s/o Thangzaliana, Ramhlun South nia inchhálte hnen aṭangin crystal methamphetamine kg. 48.061 an man. Meth an mana inhnamhnawih nia puh Zalinthluaii (46) d/o Rinruma (L), Zokhawthar, tuna Durtlang Leitana khawsa mek nia inchhál pawh zan dar 11:15-ah Durtlang Leitanah an man bawk.

Morgue van pe

Aizawl South-II bialtu MLA Lalchhuanthanga chuan MLA fund aṭanga a lei Mahindra Pickup (4×4) chu ruang phurhna (morgue van) atana hman turin nimin zing khan Mission Veng Branch YMA hnenah a pe. Lirthei inhlanna hun hi Synod Conference Centre tualah buatsaih a ni.

HC Judge-in tlawh

Gauhati High Court judge Justice Michael Zothankhuma, Mizoram State Legal Services Authority-a executive chairman ni bawk chuan nimin khan Kolasib Project Venga Fast Track Court building sak mek a tlawh. Fast Track Court building sak mek atan hian cheng nuai 1,799 ruahman a ni a, September 2022 khan sak ṭan niin, April 2025-ah sak zawh beisei a ni.

In kâng ral

Nimin khan Ngaizawl khuaa Suansawmlanga in chu a kâng a, bungraw chuh hman lohin a kâng ral. In kâng hi ṭhelh tumin khawtlang mipuiin ṭan la mah se an ṭhelh mit thei lo a, an ṭhenawmte in kâng kai tur erawh an veng thei thung.