Assembly House-ah bill pahnih pawm

February 6, Ningani khan Assembly session-ah Urban Development & Poverty Alleviation (UDPA) minister K Sapdanga leh Local Administration minister C Lalsawivunga bill put luhte sawiho a nih hnuah pawm a ni.

UDPA Minister put luh, 'The Mizoram Urban and Regional Development Bill, 2025' chu siamṭhat ngai laite siamṭhat tura pawm a ni a; K Sapdanga chuan, Mizorama cheng 52% chu khawpuia cheng an nih thu sawiin, "Goa dawta khawpuia cheng san berna state kan ni. Kum 2011 aṭanga 2021 inkarah khawpuia cheng 28%-in an pung," a ti.

K Sapdanga chuan, khawpui ṭhan dan ruahmanna mumal zawka siam a nih theihna tura dan hman mek MURD Act, 1990 chu kum 35 kal taa mi a nih avangin sorkar laipui aṭanga scheme lo kalte a phuhru zo tawh lo tih sawiin, "Siamṭhat ngai leh belh ngai a tam tawh," a ti a, siamṭhat ai chuan a thar hlaka thlak mai chi tawh zawka an hriat thu a sawi.

Dan thar The Mizoram Urban and Regional Developmet Bill, 2025 duan a nih thu sawiin UDPA Minister chuan, "Dan hmasa nen thil tam tak thlak danglam a ni. Khawpui ṭhang zelah hmasawnna mumal zawka kalpui a nih theih nan he dan huap zau zawk hi mamawhna a lian chho zel dawn," a ti.

LAD minister C Lalsawivunga put luh The Mizoram (Village Councils) Bill, 2025 pawh sawiho a nih hnuah lungrual taka pawm a ni.

C Lalsawivunga chuan, dan thar danglam bikna tur chu VC member zingah sorkar sum tichingpen an awm chuan VC tawp ṭhiat loa a tisualtu member hrem an ni dawn tih sawiin, "Bill-ah hian dan hluia a ṭha lai leh la hman chhunzawm theih zawng zawngte chu seng luh a ni. VC din, ṭhiah, a hun chhung, hmeichhe tana seat hauhsak, etc. a ngai ang leh tlema tidanglam hretin dan tharah hian seng luh vek a ni," a ti.

VC thuneihna tam zawk pek rawt a nih thu sawiin LAD Minister chuan, "Chiang leh felfai zawkin an thuneihnate pawh ziah a ni a, VC inpek theih dan pawh mumal zawka siam a ni a, India Danpuia panchayat mawhphurhna zawng zawng seng luh a ni," a ti a; UN Sustainable Development Goals 17 tihhlawhtlinna tur pawh dan tharah dah telh a nih thu a sawi.

C Lalsawivunga chuan, VC-a member awm thei zat chu dan hmasaah chhungkaw awm zata teh a nih laiin, dan tharah chuan mihring cheng zata teh a ni tawh dawn thu a sawi a, "Mihring 500 chennaah member 3 an awm a, mi 500 aia tamnaah member 5 an awm dawn. Mi 1,000-2,000 inkarah member 7 an awm ang a, mi 2,000 chung lamah member 9 an awm ang. VC term chu kum 5 a ni dawn a, sorkarin ṭul bik thilah chuan thla 12 thlengin a pawt sei thei dawn a ni," a ti.