Intuai hriam reng turin doctor-te chah

Assembly speaker Lalbiakzama chuan March 6, Ningani khan Aijal Club-ah ASM (ASMCON) inkhawmpui vawi 5-na leh India Association of Paediatrics Surgeon (NEIAPSCON) inkhawmpui vawi 19-na a hmanpui a; an thiamna tuai hriam reng turin doctor-te a chah.

Lalbiakzama chuan, surgeon-te hnathawh chu a pawimawh thu leh inpekna zawng zawng nena thawh ngai a nih thu sawiin, "Damlote enkawl damna atan in thiamnate tât hriam reng u la, hriatthiamna leh lainatna nen damlote enkawlin, damna thlentu nih tum zel ang che u," a ti.

Doctor-te chu an dam chhungin mi dang tana ràwn tlak, natna enkawl damna kawngah thil thar, enkawlna ṭha zawk hmu chhuaktu nih tuma inzir reng turin Assembly Speaker chuan a ngen a; natna enkawl damna tura thawktu nih duh tâwk mai loin, invenna lamah pawh mipui zirtirtu nih tum turin a chah bawk.