Governor-in sikul 6-ah smartboard a hlan

Governor Gen. Dr Vijay Kumar Singh chuan nimin khan Siaha a tlawh a, Smart Classroom project hnuaia ITI Ltd. leh implementing partner Living Thoughts Organisation ten Numaligarh Refinery Limited corporate social responsibility fund aṭanga an pek smartboard chu Siaha district-a sikul paruk hnenah a hlan.

Smartboard hi Phura High School, ZM High School, Border High School, Siasi Middle School, Theiva Middle School leh Lopu Middle School hnenah hlan a ni.

Governor chuan, hamṭhatna dawngtu sikulte a lawmpui thu sawiin, "Prime Minister-in India ram hmun kilkhawr ber bera awmte pawhin ram chhung hmun dangte ruala hmasawnna an hmuh ve zel theih nan hmalak a ngai pawimawh a, hamṭhatna leh remchanna awmte pawh an neih zung zung theih nana ṭan lak a ngai. Smartboard sem hi thingtlang kilkhawr zawk leh khawpuia cheng zirlaite hmasawnna kawnga intluktlanna tura ruahman a ni a, hei hian zirlaite hnenah zirna ṭha leh hlawhtlinna a pek ngei ka beisei," a ti.

Ziak leh chhiar thiam leh mi taima tamna Mizoramin theihna nasa tak a neih thu sawiin Larsap chuan, "Hmalakna dik, hmanraw ṭha leh remchanna a awm phawt chuan tun ai hian nasa takin Mizoramin hma a sawn thei. Mizoram sorkar pawhin thingtlang kilkhawr zawka chengte hmasawn nan theihtawp a chhuah a ni," a ti a; sorkar hnathawkte chu thil thar leh ṭha zawk, hmasawnna atana pawimawhte ngaihtuaha a hnena thlen hreh lo turin a chah.

Smartboard hlanna inkhawm hi Siaha Circuit House-ah neih a ni a, bawrhsap VL Hruaizela Khiangte-in a kaihruai. MADC deputy chief executive member S Lalremtluanga, SDO (Sadar) Vanlal-chhuanliana leh Living Thoughts Organisation aiawhin Prem Roy ten thu an sawi bawk.