District tinah Chapchar Kût hman a ni

Nimin khan Mizoram hmun hrang hrangah Chapchar Kût hlim taka hman a ni a, district khawpui hrang hrangah MLA, minister leh bawrhsapte'n an hmanpui.

Chapchar Kût hmannah hian Mizo hnam lâm, zai, infiamna te, hnam thuam leh lemchante entira ngaihthlak a ni. Chhawnghnawh hun hman a ni a, concert-te buatsaih nih bakah, Kût lanu/miss leh val/mister thlan a ni bawk.

LUNGLEI

Lungleiah chuan C Ṭhuamluaia Mualah Chapchar Kût hman a ni a, Lunglei East bialtu Lalrinpuii, minister-in a hmanpui a, Kût pualin stall 41 siam a ni.

Lalrinpuii chuan, Kût thupui 'Zo nun ze mawi - hawihhawmna' chu Mizo nunphung leh ze laimu a nih thu sawiin, "Mi zahawma min siamtu leh mite hneh tura ralthuam ṭha ber, incheina hman tlak ber leh pawimawh ber a nih avangin hawihhawmna hi khawi hmunah pawh nunpuiin, vawng him tlat ang u," a ti.

SIAHA

Siahaah chuan district bawrhsap VL Hruaizela Khiangte hoin Siaha Vaihpi Tlyliah-ah Chapchar Kût hman a ni a; kum 27 chhung MHIP Sub-Hqrs president ni tawh H Lalawii hnenah chawimawina nopui hlan a ni.

VL Hruaizela Khiangte chuan, hnam ro hlute ngai pawimawha humhalh tlat chu pi leh pute chawimawina leh ṭhangtharte tana ro hlu hnutchhiah theih ropui tak a nih thu a sawi a, "Siaha hi district upa pawl a nih angin kawng tinrengah hmahruaitu nih tum ila, district dangte entawn tlaka siam turin sorkar bakah khawtlang, kohhran leh NGO-te thawhhona ṭha neih a ṭul," a ti.

CHAMPHAI

Champhaiah chuan Chapchar Kût hi Zotlang Sports Stadium-ah hman niin, Champhai North bialtu MLA H Ginzalala'n a hmanpui.

H Ginzalala chuan, Mizo hnam hrang hrangte inpumkhat a ṭul thu sawiin, "Kan danglamna tlem tê dah ṭha i la, kan inpumkhat chuan kan ding chhuak ang a, kan inṭhen chuan kan tlusawp ang," a ti a; Chapchar Kût hmanna senso atan Rs 50,000 a pe.

KOLASIB

Chapchar Kût hi Kolasib-ah chuan district bawrhsap Robert C Lalhmangaiha hoin Diakkawn Field-ah hman a ni a; Kût pualin zingah Kolasib CMO office buatsaihin Walk for Health Walkathon 2025 huaihawt a ni bawk.

Kolasib Bawrhsap chuan, hawihhâwmna chu Mizo tawh phawt nuna bet tlat tur a nih thu a sawi a, "Mizote'n kan hnam ro hlute kan humhalh thiam a ngai. Mizo hnam ro hlu hian a huam zau hle a, he'ng kan hnam ro hlute hi kan hriata a hlutnate kan inzirtir chhàwn zel a ngai a ni," a ti.

SERCHHIP

Serchhip Sports Complex-ah district bawrhsap Paul L Khuma hoin Chapchar Kût hman a ni.

Paul L Khuma chuan, hawihawmna chu thua sawifiah chi a ni lo a, a tiha tih, a nuna nun chhuahpui chi a nih thu a sawi a, "Pi pu chena kan ro hlu mahni inphata mi dangte tana inpekna - tlawmngaihna te, khawngaihna te, mi dangte hriatthiamna te, thilphalna te, huaisennate chawi nungtu leh ṭhangthar lo la awm turte hnena hlan chhawngtu nih i tum ṭheuh ang u," a ti.

LAWNGTLAI

Lawngtlaiah chuan DC Pisa tualah Chapchar Kût hman a ni a, Lawngtlai East bialtu MLA Dr Lorrain Lalpekliana Chinzah-in hmanpuiin, hmun hrang hranga Zo hnahthlak awmte chu inlungrualna, inhmangaihna leh induhsakna lam hawi zel turin a chah.

Dr Lorrain Lalpekliana chuan, Kût thupui 'Hawihhawmna' chu vawn nun zel a ṭul thu a sawi a, "Zo fate hi tlem rih hle mah ila, kan ropuina a nêp phah chuang lo. Kan Zo nun ze mawi vawng nun tlat a nih chuan hnam chak leh ropui tak, khawvel mite entawn kan ni thei," a ti.

MAMIT

Mamitah chuan district bawrhsap K Laltlawmlova hoin GSA Khelmualah Chapchar Kût hman a ni.

K Laltlawmlova chuan, tlawmngaihna chu Mizote thil neih zinga hlu ber a nih thu sawiin, "Tunlai khawvelah inbiakpawhnate a awlsam tawh a, Mizote'n tlawmngaihna hlu tak kan neihte a tidal deuh em aw tih theih a ni a, tlawmngaihna hi Mizo kan nihna anga kan chhawm nung zel tur a ni," a ti.

SAITUAL

Saitual Public Playground-ah bialtu MLA Prof. Lalnilawma, minister of state hoin Chapchar Kût hman a ni.

Prof. Lalnilawma chuan, Kût thupui 'Zo nun ze mawi - hawihhawmna' tih chu sawifiah aia nuna lantir a pawimawh zawk thu sawiin, "Saitual district hmasawn nan district mipuite'n mikhualte chungah hawihawmna kan lantir zel a ṭul," a ti a; Saitual district-in hma a sawn zel theih nan ruahmanna siama bawhzui zel a inhuam thu a sawi.

KHAWZAWL

Khawzawlah chuan SYMA khelmualah bawrhsap K Vanlalṭhiana hoin Chapchar Kût hman a ni.

K Vanlalṭhiana chuan, Chapchar Kûtah hian Mizo pi leh pute rinawmna, hawihhâwmna, inlungrualna leh tlawmngaihnate hre chhuak thar leh turin kal khawmte a sawm a, "Kan Zoram ropui zel theih nan inunauna leh inlungrualna nen ṭha taka thawk hoin ṭangrual zel ang u," a ti.

HNAHTHIAL

Chapchar Kût hi Hnahthialah chuan HDSC Ground No. 1-ah bialtu MLA Jeje Lalpekhlua hoin hman a ni a; MLA hian ruihhlo do nan YMA Sub-Hqrs, Hnahthial hnenah Rs 1,00,000 a hlan.

Jeje Lalpekhlua chuan, budget session neih mek a nih thu sawiin, "Hnahthial district mipui tan Assembly-ah ṭawngkaa chhàn ngai zawhna (starred question) 70 ngawt mai kan pu lut a, Hnahthial district hmasawn nan officer leh NGO hrang hrangte'n ṭha taka min thlawp ṭhin avangin ka lawm tak zet a ni," a ti a; ZPM sorkar hmalakna leh hmachhawp hrang hrang a tarlang.