STEE Rules-ah tuna kal dan bak Tihngaiha a awm chuang lo: CM

Chief minister Lal Thanhawla chuan, Mizo ṭhalaite ngaihtuahna avangin State Technical Entrance Examination (STEE) Rules Category I-ah Chakmate dah leh an ni tih sawiin, "Tuna sorkar kal dan bak hi chu tihngaihna a awm chuang lo," a ti.

Chief Minister hian nimin khan Congress Bhavan-a in­khawmah thu sawiin, "STEE Rules sorkarin a tihdanglam kha Court-a khin a nih khan a tla dawn sa tih kan hria a, kan rin lâwk ang ngeiin a tla ta rêng a ni," a ti a; khua leh tui nihnaah state sorkarin thuneihna pumhlûm a neih loh avangin STEE Rules chu tun ang baka tihdanglam ngaihna a awm tawh lo niin a sawi.
STEE Rules tihdanglam a nih avangin Mizo ṭhalai tam tak doctor leh engineer zirturte'n an seat an chán thei tih sawiin Lal Thanhawla chuan, "Mizo ṭha­laite'n an seat an chán mai tur hi ngaihngam chi a ni lo a, a mawhphurtu nih pawh kan duh lo. Chuvangin, minister-in huaisen takin hma a la ta a ni," a ti.
Chief Minister sawi danin, India ram pum huap ang chi dan chu state sorkarin a duh duha a tih theih a ni lo. Tripura transit camp-a Bru-te pawh Mizoram sorkar chuan hruai tum tawh lo a, Mizoram electoral roll aṭanga paih a duhna a rei tawh a; mahse, state thuneihna piah lam a nih avangin an duh angin hma an la thei lo a ni.
Zirlaite'n an duh dan anga thil kaltir an tum nia sawiin Lal Thanhawla chuan, "Kan duh dan ringawta thil kalpui kan tum avang hian mi dang tana harsatna thlen a hlauhawm. STEE Rules-ah hian sawisel tum leh harsatna siam tum an awm pawhin tun ang baka dika kal ngaihna a awm lo," a ti.
Higher & Technical Edu­cation (HTE) minister R Romawia pawhin STEE Rules chu zirlai pawl duh dan anga an tihdanglam thu sawiin, "Court-ah min khin tâk avangin zirlai pawlte duh loh dan hman lo thei kan ni lo," a ti a; zirlai pawlte duh dan anga duan STEE Rules chu tihdanglam tak a nih avangin Court-in thubuai a tihtawp tak thu a sawi.
HTE Minister sawi danin, STEE result chhuak hnuhnung berah khan Category-I aṭanga tling thei Chakma pali an awm a, mahse an tih ṭhat vak hlawm loh avangin engineer leh doctor zir phâk tur erawh an awm lo.
STEE Rules khingtu Mizoram Chakma Students Union (MCSU)-te chu Court-a an kalin document an neih ṭhat thu sawiin R Romawia chuan, "Kum 1950-a President-in Scheduled Tribe leh Scheduled Caste a tihchhuah nen lam an thehlut vek a ni. Document ṭha awm si loa pâwng tâl vak vak hi a fuh lo," a ti.
Tarlan tawh angin, STEE Rules-a Category I-a Chakmate dah an nih chu duh loin MZP-te'n kum 2014-ah lungawi lohna an lantir a, chumi hnuah Chakmate chu Category-I aṭangin paih an ni. MCSU-te chu Gauhati High Court-ah an zualko a, chuvang chuan Mizoram sorkarin Chakma chu Category I-ah a dah leh ta a ni.