Lawngtlaiah phûl lem phah phalsak

Lawngtlaia CYLA Ground-ah phûl lem phah theih a ni dawn a; phûl lem phahna tur sum pek a nih tur thu, tun hnai khan DoNER minister Sarbananda Sonowal chuan Sports minister Zodin­tluanga a rawn hriattir.

Development of North Eastern Region (DoNER) minister hian July 15, 2015 khan Sports minister Zodin­tluanga hnenah lehkha thawnin, Mizoram chu ruahtui tlak tamna a nih avangin USIS (PYKKA) hnuaiah CYLA Ground-a phûl lem phahna tur sum Mizoram sorkarah pek a nih dawn thu a hriattir a; khelmual danga phahna tur sum pawh a ṭul anga ngaihtuahsak theih a nih tur thu a inziak a ni.

Vanglaini zawhna chhangin Sports Minister chuan, FIFA hnuaiah artificial grass chungah inkhelh a nih ngai loh avangin sorkar laipui pawhin artificial grass phah a remti tawh lo tih a sawi a; mahse, Mizoram lama hotute'n nasa taka an nawr avang leh, Mizoram chu ruahtui tamna a nih avangin phûl tak tak (natural grass) phah a remchan loh avangin phûl lem phah a phalsak leh ta niin a sawi.

Zodintluanga chuan, CYLA Ground-a phûl lem phah a nih theih nan project an siam ang a, DoNER-ah an thehlut thuai dawn tih a sawi a; a hma pawhin project an lo siam tawh a, mahse DoNER-in a lo hnâwl tawh avangin a thara siam a ngai niin a sawi bawk.