KHAWTHLIR

Thingfal H/S hawng
Lunglei District High Powered Committee vice chairman S Laldingliana chuan nimin khan RMSA sum hmanga Thingfal High School building sak thar chu a hawng. Thingfal H/S sak nan hian Rs. 35,25,000 hman a ni a; kum 2011-ah hna ṭan tawh mah se, contractor chhawr fuh loh vangin a pàmṭûl a ni a, contractor dangin an sa leh a ni.

Thisen pe
Mizoram Hindi Training College chuan nimin khan Aizawl Civil Hospital tan thisen unit 30 an pe a, a petute hmeichhia 18 leh mipa 12 an ni.

Kelkang tlawh
NLUP Implementing Board chairman JH Roṭhuama chuan Ningani khan Kelkâng a tlawh a, sorkarin Kelkang khaw chhawmdawlna atana a tih hrang hrangte a enfiah. Kelkang Revival Managing Committee hnenah computer leh printer a pe bawk.

Congress office sak tum vangin harsatna
Champhai South Block Congress chuan Cham­phai DC pisa hmun hlui gate bulah office sak an tum hnai a, hei vang hian a bul vela quarters-a khawsate chu a rang lama in luah tur zawntir turin Cham­phai DCSO hrilh a ni.
Champhai District NGO Coordination Com­mittee hruaitute aṭanga thu dawn danin, Champhai South Block Congress-te hian office an sa dawn a nih chuan Supply department quarters-te ṭhiah a ngai dawn a ni. Champhai NGO hruai­tute chuan, Cham­phai South Block Cong­ress hnenah hian an LSC chu mipuite kutah pe lêt turin an lo ngen tawh tih an sawi.

Mei zu 9 an man
Aizawl District Anti Tobacco Squad chuan nimin khan New Secretariat Complex-ah squad drive neiin, office ṭhenkhat an enfiah a; dan bawhchhiaa mei zu mi pakua an man a, pawisa an chawitir a, an pawisa chawi hi a vaiin Rs. 1,450 a ni.

Thiin chhar
Sawikhawlama (40) h/o Lalnunhlimi, Darlawn chu July 22, 2015 zana a lui kal a haw loh avangin an ṭhenawm hnaia mite'n an zawng a, nimin chawhma dar 10:15 vel khan Tuiker pawhtu luitê-ah thi a hmuh a ni. A ruang hi nimin khan Darlawn damdawi-inah postmortem a ni.

MUP-in Thangmawia ui
Mizoram Upa Pawl (MUP) general headquarters chuan thuchhuah siamin, ZORO president R Thangmawia, Geneva, Switzerland-a a zin laia a thi chu an ui thu an tarlang.

P&E meeting
Power & Electricity department-a Aizawl Project Circle-I chuan July 23-24 chhung khan IPR Conference Hall-ah Energy Accounting Feeder Wise meeting an nei. Meeting hi P&E superintending engineer R Lalṭhakima'n a kaihruai a, engineer-in-chief L Pachuau-in a hmanpui a ni.

MZP lawm
MZP chuan thuchhuah siamin, July 23, 2015-a Council of Ministers meeting-in The Mizoram Lokayukta Rules an pawm ta chu lawmawm an tih thu an tarlang. Mizorama eirukna leh hlemhletna tihbo a nih theih nan a rang thei ang bera Lokayukta chak leh huaisen taka hnathawk thei tur din thuai turin Mizoram sorkar an ngen nghal bawk.