Sual chhui chhuah hna a chak Hremna kalpui chak tawk lo - DGP

Director General of Police Dharmendra Kumar chuan, "Dan bawhchhiatna chhui hnaah Mizoram police-in hna an thawk ṭhain an thawh chak hle. Mahse, prosecution hna lam a chak tawk lo a ni," a ti.

Mizoram pum huap Crime Review Meeting nimin khan Police head­quarters-a Arya Mess-a neihah DGP Dharmendra Kumar chuan thu sawiin, kumin January-June chhunga Mizoram puma thubuai ziah luh 1,168 chu nikum January-June chhunga thubuai ziah luh 1,289 aiin 121-in a tlem tih tarlan.

Dharmendra Kumar chuan, "Kumin tìr lamah thil duhawm lo tak tak thleng awm nual mah se, police-te'n chak tak leh huai taka an beih let vangin, dan kenkawh kawngah harsatna a awm zui lo a, Mizoram police-te'n force dangte aiin hna an thawk tha zawk a ni," a ti.

March 28, 2015-a Zokhawthiang HPC(D) hel hoin MLA rual an lambun leh police pathum an kah hlum chungchang sawi langin, DGP chuan, Police-ten an tih tur dik tak tiin hel pawlte an chhang let tih sawiin, tharum thawhtute chu a remchan dan anga nawr zui zel turin Police-te a chah a, "Mipuite nunna kan hloh tawh tur a ni lo," a ti.

Dharmendra Kumar chuan, nikum leh kuminah Police department-a hna thawh ṭhenkhatte a hun taka zawh a nih loh avangin Central aṭanga sum lo kal leh tur tam tham tak an hloh thu a sawi a; police officer-te chu an awmna hmun ṭheuha hmasawnna lam hna awmte enpui tur leh, a hun taka zawh a nih theih nan contractor leh enkawltu engineer-te nawr ṭhin turin a chah.

Mizoram DGP chuan, ramri vengtu, border outpost-a sipai duty-te nen thawhhona ṭha zawk neih a ṭul thu leh sipai duty-te thawhpui ṭhat a pawimawh thu a sawi a, hmun hrehawm zawka duty-te chu duat an ngaih thu a sawi a ni.

Crime review Meeting hi AIG-I LR Dingliana'n a kaihruai a; DIG (Northern Range) LT Hrangchal leh DIG (Southern Range) Joseph Lalchhuanate'n an huam chhung ve vea case report an pe a, Additional DGP Thianghlima Pachuau leh IGP Zorammawiate'n thu an sawi bawk. District leh unit tina SP te, battalion commandant te, additional SP-te leh SDPO-te an tel a ni.

Meeting-a tarlan danin, Mizoram police-a Northern Range huam chhung, district pangaah kumin January-June chhungin thubuai 1,007 ziah luh a ni a, nikum January-June ah chuan 1,092 ziah luh niin, kuminah 85-in a tlahniam. Southern Range huam chhunga district pathumah chuan January-June 2015-ah case 161 ziah luh niin, nikumah 197 ziah luh a ni a; kuminah 36-in a tlahniam a ni.

District pariat zingah Aizawl district-ah thubuai ziah luh a sang filawr hle a, thubuai 563 ziah luh niin, a dawttu Kolasib district-ah 165 ziah luh a ni.