Sum harsatna ngaihsak loah sorkar puh

MNF party chuan nimin khan Mizo Hnam Runah mi thar lawm luhna inkhawm an hmang a; an president Zoramthanga'n thu sawiin, Congress party kaihhruai sorkar chu ram vei tak tak loah leh Mizoram sum harsatna sawi tura Delhi-a kal duh loah a puh.

Zoramthanga chuan, Congress sorkar chu vaiin an thunun avangin ram an vei tak tak lo nia sawiin, "Mizoramin sum lama harsatna tàwp a tawh laia PM-in sum chungchanga state hrang hrangte harsatna sawipui tura a kohah pawh Delhi-a an piin NDA koh a nih avanga kal lo tura a tih avangin an kal duh lo," a ti. Delhi lama an pite’n thupek an siam tawh chuan ‘Zoram tan’ tih a lang tawh lo a, mipuite harsatna an hre pha tawh lo niin a sawi.

Mizoramin sum harsatna namén lo a tâwk mek tih sawiin, Zorama chuan, Mizoram sorkarin AMC sum nuai 1,000 chuang a hrênsak a, mimal leh company-ah cheng vaibelchhe tél an ba a, MR bill a lak theih loh a, sorkar hnathawk zingah thla 4/5 hlawh la thei lo tam tak an awm thu a sawi.

Zoramthanga chuan, Congress sorkar aṭangin Kristiannain beihna nasa tak a tâwk mek nia sawiim, "Congress Thlifim-ah pastor zu do hming chhinchhiahna tur an tichhuak a. Kan pastor-te’n an hlauh loh êm avangin an thu an zûk leh a ni," a ti. Congress president-in ngaihdam dil loa vice president R Lalzirliana ringawtin ngaihdam a dil chu mak a tih thu sawiin, "An president ber a ngawi tlat hi a mak a, Congress party-in kohhran, sakhua leh puithiamte an hmuh dan a tichiang hle," a ti.

MNF President chuan ZORO president R Thangmawia a thi ta chu a ui thu sawiin, a ruang hmuahnaah MNF member-te a tam thei ang ber kal tura an inhriattir thu a sawi.

Nimina inkhawmah hian lehkhathiam 10 chuang an lawm lut niin MNF thuchhuah chuan a tarlang.