Kohhran Hmeichhiate'n zûk leh hmuam donaah ram pum huapa hmalak an rêl

Presbyterian Kohhran Hmeichhe Inkhawmpui Lian vawi 51-na, Thenzawl Loṭhazawl khelmuala neih chu nizan khan a ṭiak. Inkhawmpuiah hian zûk leh hmuam donaah ram pum huapa hmalak an rel.

Kohhran Hmeichhe Inkhawmpui Lian hi Thenzawl Loṭhazawl khelmuala pandal sakah nghah a ni a, thupui chu 'Rinawmna' tih a ni. Inrinni khan nilengin Thenzawl Field Veng Kohhran biak-inah rorel a ni a; general agenda pasarih pharh a ni a, agenda 15 erawh chu inhrilhfiah a ni thung.

Rorelnaah hian zûk leh hmuam donaah ram pum huapa hmalak an rèl bakah, HIV/AIDS chungchangah inzirtir kalpui zui zel an rél a; plastic bawlhhlawh paih dan ṭha zawk inzirtir an rèl bakah, tu leh fate biak-ina hruai uar lehzual tura hmalak leh Synod Hospital leh John Willams Hospital pualin ṭum khat thawhhlawm lak khawm an rel bawk.

Kum 2025-26 budget atan cheng nuai 43 an pawm a, kum 2026 rorel inkhawm nghahna atan Champhai Vengthlang, kum 2027 Inkhawmpui Lian nghahna atan North Vanlaiphai leh kum 2028 rorel inkhawm neihna atan Sihphir Kohhran an thlang.

Kum 2025-2027 chhunga Kohhran Hmeichhe Inkhawmpui Lian hruaitu turte thlan a ni a; chairman tur K Vanlalrawni, Mission Veng leh general secretary tur H Vanlalruati, Synod coordinator te erawh chu Synod-in a lo ruat tawh a ni.

Presbyterian Kohhran Hmeichhiaah hian member 2,03,840 an awm mek a ni.