Belgium mi leh sa journalist Lengpui Airport-ah man a ni

Belgium mi journalist nia insawi Simon Clement chu March 5, 2025 khan Lengpui Airport-ah man a ni a, Court thu angin March 8 khan Central Jail-ah dah luh a ni.

Thu dawn danin, Simon Clement hi MO News Agency-a thawk a ni a; Mizoram chhuahsan a tum laiin a ipah silaimu cartridge ruak pahnih a awm avang leh a visa neih hmang dik loa puhin Lengpui Airport-ah man a ni.

Simon Clement lakah hian Arms Act Section 25 (1-B) hnuaiah Sairang Police Station-ah thubuai ziah luh a ni a; March 6 khan court-ah hruai a nih hnuah a thubuai hi Aizawl Police Station-ah hlan a ni. March 8, Inrinni khan court-ah hruai leh a ni a, court thu angin Central Jail-ah dah luh zui a ni.

Simon Clement hian phalna nei loin Mizoram aṭangin Myanmar ramah a lut a, Myanmar-a ralthuam keng pawl ṭhenkhat hmu-ah puh a ni bawk.