Vairengteah in pathum a kâng; Pitar kum 89 mi a kâng hlum

March 8, Inrinni tlai dar 4 vel khan Vairengte IOC Vengah in pathum - Assam type in pakhat leh râp in pahnih a kâng ral a, chhungkaw pakhata nu ber, pitar kum 89 mi a kâng hlum. In pathumah hian chhungkaw pali an cheng.

Thu dawn danin, kângmei hi Lali (89) te in aṭanga chhuak a nia hriat a ni a, kângmei chhuah laiin inah Lali chiah a awm a, a chhungte chu hna thawkin an chhuak. Lali hi kawngka bulah a ruang hmuh a ni a, tlai dar 5:30 velah a ruang lak chhuah niin, nimin khan vui a ni.

Lali te in kâng hian a chhaka an makpa te nupa chenna in man kaiin, chu chuan a chhak kawngpui àna Lalṭanpuia (L) in, Assam type a kâng kai ve leh bawk. Lalṭanpuia in hi a chung zawk chu an fanute chhungkuain an luah a, in hnuai zawk chu nupa rekin an luah thung. In kan lai hian inah Lali chiah a awm a ni.

Kângmei chhuah thu hriat a nih veleh khawtlangin ṭelh tumin theihtawp an chhuah a, Fire & Emergency Service lam pawh hriattir an ni. In kângte hi ṭhelh tum ni mah se, ṭhelh theih lohin a kâng ral hlawm a, Santro car leh R15 bike pakhat ve ve a kâng ral bawk.