BCM-in MKHC-a tel tawh loh an rêl

Baptist Church of Mizoram (BCM) rorelna sang ber Assembly chuan Council of Churches in Mizoram (CCM) a din tawh avangin Mizoram Kohhran Hruaitute Committee (MKHC)-ah tel tawh loh a remti a; fa nei tam tura uar lehzuala inzirtir an rel bawk.

BCM Assembly vawi 129-na hi March 5, 2025 zan khan ṭan a ni a, nizan khan a ṭiak. March 6-8 chhung chhun lamah rorel a ni a, zan lamah Pathian biak inkhawm a awm ṭhin. Nimin chawhma inkhawmah khan pastor atan probationary pastor ṭang lai panga nemngheh an ni.

BCM inkhawmpui hian October 27, 2024-ah CCM a din tak avangin MKHC-a tel zui tawh loh rawtna an pawm. Thu dawn danin, CCM Executive Committee December 20, 2024-a ṭhukhawmin CCM member kohhrante chu MKHC-ah tel chhunzawm tawh lo mai ni se, tiin an rawt a, chu chu BCM Administrative Committee-in January 28, 2025 khan a pawm ve leh a; thutlukna hi BCM Assembly-ah hian report niin, pawm a ni.

Fa nei tam tura inzirtir chungchangah area baptist council (ABC) pathum aṭanga rawtna lut angin, fa nei tam tura uar lehzuala inzirtir an rel a; BCM Assembly-in ruihhlo donaa hma a lak mekna chu chhunzawm zel an remtih bakah, CCM ang pawha hmalak turin rawtna thlen an remti.

Mizoram People Forum (MPF)-a tel chungchang sawiho a ni a, ngaihchan rih ni se, an ti. Leilung, thing leh mau leh nungchate humhalh chungchanga hmalak rawtna an pawm a; Mizo ṭawng dik leh hman uar chungchangah BCM pumpuia hmalak an rel.

Ram leh hnam tan leh ruihhlo ngaite pualin ram pum huapa ṭawngṭai rual buatsaih an rel a; biak-in sak danah rualbanlote awlsam zawkna turin ruahmanna siam an rel. CCM-a tel kohhrante'n in ang tlanga an hman theih nan CCM Special Sunday atan October thla Pathianni hnuhnung ber rawtna an pawm bawk.

BCM Assembly hian kum 2027-a Assembly nghahna atan BCM Ramzotlang Kohhran an thlang a; kum 2025-26 budget atan cheng nuai 13,274.56 an pawm a ni.