KHAWTHLIR

Thisen pe

March 8, Inrinni khan KṬP, Tuikual South Branch chuan an din champha pualin an kohhran hall-ah Synod Hospital tan thisen unit 31 an pe a, petute mipa 29 leh hmeichhia pahnih an ni. Adventist Youth Federation, Lunglei South pawhin Lunglei Civil Hospital tan thisen unit 13 an pe a, petute mipa pakua leh hmeichhia pali an ni.

AR Women's Day

Assam Rifles-te chuan March 8, Inrinni khan Siahaah International Women's Day an hmang. Springfield School, Siaha sikul naupangte leh zirtirtute nen hun an hmangho a; hmeichhe pawimawhna leh tihhmasawnna chungchang an inzirtir a ni.

Dry Day puang

Lawngtlai district election officer (DEO) Cheemala Siva Gopal Reddy, bawrhsap chuan hriattirna chhuahin, Chakma Autonomous District Council (CADC) huam chhunga village council (VC) inthlanna neih turah, inthlanna felfai leh thianghlim a awm theih nan March 11-13, 2025 inkarah CADC huam chhungah 'Dry Day' a puang. Thupek zâwm lote chu dan anga hrem theih an ni.

Pump khâr dawn

All Mizoram Petroleum Dealers' Association (AMPEDA) chuan, March 12, 2025 (Nilaini) khian an din champha an lawm dawn avangin Mizoram puma petrol pump-te khâr a ni dawn tih an tarlang. AMPEDA hian mipui hriatthiamna an ngen a ni.

Chawimawina dawng

March 8, Inrinni khan Delhi-a Women Entrepreneurship Summit-ah Meriam L Hrangchal chu hmeichhe hlawhtling chawimawina 'Lifetime Achievement Award' hlan a ni. Meriam L Hrangchal hian Vestige Marketing Pvt Ltd hnuaiah kum 2014-ah bul a ṭan a, Vestige Millionair Council member a ni mek; a hnuaiah member 1,80,000 vel an awm. Women Entrepreneurship Summit hi Confederation of All India Traders leh Association of Direct Selling Entities of India te buatsaih a ni.