Lungleiah Green Mini Marathon buatsaih

Lunglei District Legal Services Authority (DLSA) leh YMA Sub-Headquarters, Lunglei chuan March 8, Inrinni zing khan Lunglei Green Mini Marathon 2025 an buatsaih a; Lunglei High Powered Committee (HPC) vice chairman V Malsawmtluanga, MLA-in hmanpuiin lawmman a sem.

Green Mini Marathon-ah hian mipa tan km. 9 leh hmeichhe tan km. 7-a thui tlan kawng (route) ruahman a ni a; Lunglei khawpuia YMA branch hrang hrang aṭangin mipa 111 leh hmeichhia 40, an vaiin mi 151 an tel.

Marathon kharnaah hian Special Campaign on Public Education on Environment Protection & Conservation Laws, Climate Crisis and Sustainable Practices hnuaia Lunglei DLSA hmalaknaa college zirlaite pual essay inziahsiak result puan a ni bawk.

V Malsawmtluanga chuan, infiamna chu taksa leh rilru hriselna atan bakah, ruihhlo dona atan hmanraw pawimawh ber pakhat a nih thu thu sawiin, Mizoram sorkarin infiamna leh ṭhalaite tihhmasawnna a ngaih pawimawh thu a sawi a, "Bána Kaih scheme kaltlangin infiamna tihmasawn turin hmalak mek a ni a, Lunglei HPC kaltlang pawhin infiamna hmunhma tihchangtlun bakah, infiammite chàwisàn leh a theih ang anga ṭanpuina kawngah theihtawpa hmalak tum a ni," a ti.

Lunglei DLSA leh YMA Sub-Headquarters hmalaknaa environment humhalh inzirtirna leh infiamna chàwisànna ni kawp tura Green Mini Marathon buatsaih a ni chu lawmawm a tih thu sawiin V Malsawmtluanga chuan, "Environment humhalh kawngah ṭhalaite kan harh thar zel a ṭul a, tui thianghlim hman tur hnianghnar kan neih theih nan tuihna tipung turin ramngaw humhalh a pawimawh," a ti a; leilung leh a chhunga awmte humhalh kawngah sorkarin nasa taka hma a lak thu a sawi bawk.