Sihhmui-Zuangtui 132kV line thar leh Chite Sub-Station Minister-in a hawng
Power & Electricity minister F Rodingliana chuan March 8, Inrinni khan Sihmui-Zuangtui Sub-Station 132 kV Single Circuit Line leh 2X10MVA 33/11kV Chite Sub-Station a hawng. Minister chuan, sorkarin kawlphethaa intodelhna turin Tuivai, Chhimtuipui, Turini leh Tlawng khuahna tur a tharthawh mek tih a sawi.
F Rodingliana chuan, Mizoramin kawlpethaa intodelhna tura hma a lak dante sawiin, "Hengte hi sorkarin a ngaih pawimawh hmasawnna tluantling leh sustainable development hmalakna zel a ni. Sorkarin kawlpethaa intodelhna chu a ngai pawimawh a, Tuivai, Chhimtuipui, Turini leh Tlawng khuahna tur a tharthawh leh mek. Nizung aṭanga kawlpetha siam chhuah kawngah pawh ṭan lak mek a ni," a ti.
Sihmui-Zuangtui inkara kawlphetha hrui hlui chu PE department-in sum awm ang ang leh hmanraw hlui la hman theihte hmangin an thawm ṭhat thu sawiin Minister chuan, "Tuna kan kawlpetha lak luh pangngai chu PGCIL hoin conductor chak zawk (HTLS)-in an thlak mek a, hna an thawh chhung zawng hian 132kV Single Circuit kan hman avangin thim loin kawlpetha kan neih zui theih phah dawn," a ti a; line siam ṭhat vanga power shutdown a tlem phah beisei a nih thu a sawi.
Tarlan danin, Sihhmui-Zuangtui 132kV line thar hian Mizorama 132kV sub-station lian pathum - Zuangtui, Luangmual leh Sihhmui te a thlun zawm vek a; heng sub-station-te hian line chhiat leh state/line siam ṭhat vanga shutdown lâk a ṭul châng pawhin kawlphetha lak luhna line dang an neih tâk vek avang hian khaihlak loin kawlphetha a neih theih phah dawn.
CHITE 33/11KV SUB-STATION
* Ministry of DoNER hnuaia North Eastern Special Infrastructure Development Scheme (NESIDS) aṭangin Rs 10,28,57,992 senga thawh a ni a, senso zawng zawng DoNER-in a tum.
* Sub-Station-ah hian 10MVA, 33/11kV transformer pahnih dah a ni a, Zuangtui leh Mualpui sub-station aṭangin kawlphetha a la lut thei.
* 33kV level-a power pek chhuah theihna (outgoing bays) pahnih a nei a, Zokhawsanga Assam Rifles hmun leh RIPANS, Zemabawka kawlphetha pek nan hman theih a ni dawn.
* 11kV feeder pali - Bethlehem Veng feeder, Ramthar feeder, Falkland feeder leh New Jail feeder a chhuak ang a; heng feeder-te hian sub-station-te chhâwk zângkhaiin veng eng emaw zat mumal zawkin kawlphetha a pe thei dawn.