Lok Adalat-ah thubuai ngaihtuah

National Legal Services Authority ruahman March 8, Inrinni khan Lunglei District Legal Services Authority (DLSA) District Court-ah National Lok Adalat an buatsaih a; Lunglei district-a court la thlenpui loh thubuai leh mimal thubuai 131 an ngaihtuah.

Lungleia National Lok Adalat-ah hian thubuai ngaihtuahna tur bench pahnih buatsaih a ni a; Bench-I chu Lunglei senior civil judge BT Lala Sakachep-in a kaihruai a, Bench-II chu judicial magistrate first class C Lalbiakmuana'n a kaihruai.

Lok Adalat-ah hian thubuai ngaihtuah tura dah zingah leiba inṭhìnna a tam ber a; thubuai 16 chu sawi rempuiin, tihfel a ni a, Rs 18,25,241 hû chinfel a ni.

Lok Adalat-ah hian thubuai neitute duh dan angin inremna siampui ṭhin a ni a, court-a kala sum sèn ngai loin thubuai chinfelsak ṭhin a ni.