RUSA hnuaia college zirtirtute dah nghet turin Minister ngen

Mizo Students’ Union (MSU) Gen. Hqrs hruaitute chuan March 8, Inrinni khan Higher & Technical Education (HTE) minister Dr Vanlalthlana chu a inah an hmu a; Rashtriya Uchchatar Shiksha Abhiyan (RUSA) hnuaia college zirtirtute sorkara dah ngheh an nih theih nan hma la turin an ngen.

MSU hruaitute hian HTE Minister hnenah hian kum 2019-a RUSA hnuaia college-a assistant professor tur Mizoram Public Service Commission kaltlanga mi 70 lakte chungchang an thlen. RUSA hnuaia assictant professor-te chu kum hnih hnuah state sorkarin a chhawr chhunzawm tura lak an nih avangin, state sorkar hnuaia an ngheh thuai theih nan hma la turin Minister an ngen a ni.

HTE minister Dr Vanlalthlana chuan, MSU thu thlen chu àwm a tihpui a, RUSA hnuaia assistant professor lakte chu an ngheh ngei theih nan sorkarin hma a lak mek thu a lo hrilh niin MSU chuan an tarlang.

MSU chuan, RUSA hnuaia assistant professor thawk mekte dah ngheh an nih theihna tura sorkar hmalaknaah an lawm thu leh, sorkar hmalakna an ngaihven zui zel dawn thu an sawi bawk.